政事
亞視水緊，昨日誠哥在記者會上被問到會否收購亞視時話，「你估我好得閒」。他說，應該不會收購亞視，但希望亞視可以渡過難關。
誠哥無意收購，但小超人李澤楷會幫下忙，佢旗下的nowTV，正和亞視洽商租用亞視部份播出時段及廠房，都係條細水喉，等亞視有番少少水頂頂檔。
now高層何麗全向查詢的傳媒承認有此建議，但尚未落實。聞說nowTV而家每逢周四晚上8時至9時30分在觀星台播出《娛樂審死官》，想租下或購入亞視周四亞視本港台的播出時段，同步播出該節目，甚租用亞視大埔廠房製作。
業內人士話，亞視未來存亡未知，如nowTV出大量資金買段一個時段，若亞記最後停播，就要承受損失，較可能是短期買下一個時段，或是租用一個時段，減少風險。無論如何，亞記如此缺水，收得一蚊就是一蚊，出吓糧都好呀。
Ariel
** 博客文章文責自負,不代表本公司立場 **
何俊仁搞辭職公投，泛民內部有罵聲，民主黨主席卿姐今日話，民主黨中委未有討論何俊仁的決定，她認為現階段最重要討論政改方案未能通過的結果和影響。政壇八卦友話，卿姐咁講，有啲縮縮地喎。
卿姐話「民主黨中委未討論」，唔係話民主黨內無討論過，鐵頭仁要開記者會宣布辭職公投，難道連黨內高層如卿姐都無通知無討論？當然無可能，否則民主黨炒咗鐵頭仁都得啦。估計大家傾好用一個非正式的形式出街，只係避開泛民其他黨的質疑。
泛民飯盒會昨日才收到知會，當然無傾過、也未決定會否支持今次變相公投。但鐵頭仁辭的是超級區議會職位，搞的是全港補選，其他泛民要支持，佢地心中有氣的是鐵頭仁刻意事前不商量，怕佢地反對，搞出來就要其他人硬食。
到底這樣搞是民主黨的意思，定係那班泛民uncles(叔叔)的設計? 在佔中期間，肥佬黎、李柱銘、鐵頭仁和長毛行得好埋，他們形成另一個核心，想從學聯和學民思潮那裏奪回佔中的控制權，當時就打過「辭職公投牌」，想誘使雙學接受，作為撤退的前題。
如今第二輪政改諮詢開波，在泛民反對下，立法會勢將否決政改方案，之後就將責任放在泛民身上。呢班uncles搞辭職公投，似乎想在後政改重奪話語權。 而家泛民之中企硬出來話鐵頭仁搞得好的只有李柱銘，李馬丁話完全同意何俊仁做法同立場，強調公投是要向北京表達，港人堅決不會接受8.31人大決定，亦不接受原地踏步，公投係要攞民意，話俾中央知香港人要重啟政改五部曲。睇牌面uncle一族好似係共同進退。
不過呢班人過住行事都極之冒進，一時燥底力推佔中，一時要搶權話事，搞嘢幾個人吹吹水就去，成功先例唔多，呢單嘢都好可能係另一個失敗嘗試。即使夾硬搞辭職公投，建制派不參與，都唔知有乜效果，好易俾人鬧爆。見到卿姐答得咁避重就輕，就知連民主黨都唔想上晒身。
