港視突然翻生，買咗中移動香港子公司的流動電視牌照，進軍流動電視，明年七月啟播，搶佔免費電視市場。由於中移動係國企，唔少人聯想到係咪阿爺介入，放生港視。有評論亦認為可以紓緩政治壓力，但有意見分析事件令拒絕發牌的特區政府尷尬，顯示兩地政府處事尺度不一。
維基動一動，可以引來咁多揣測、評論、分析，魔童出招果然不同凡響。我哋就收到風，雖然中聯辦內有部門負責統籌在港的中資企業，但今次中移動同魔童之間的交易，阿爺的港澳系統，即係港澳辦同中聯辦，事前並不知情，都係同大家一齊睇公布啫。
另一有趣的現象，在維基公布交易後，兩份親中報紙大公同文匯，都低調報道，只在財經版寫咗幾百字，仲係以中移動出售移動媒體平台的角度嚟寫， 唔似好讚賞交易， 認為佢可以解決特區政府的政治難題。
咁睇嚟放生維基，又唔似係中央港澳系統的政治考慮喎，但係咪另有中央要員批准交易，就真係唔知喇。
Ariel
** 博客文章文責自負,不代表本公司立場 **
今日記者等CY述職等到大豐收了，等出一個港澳辦主任王光亞，仲講出咁有汁(juicy)的內容，但這個新聞真是記者等到的嗎?
見到這類新聞，表面看以為是很有部署的記者，等到猝不及防的王主任。實情係有線的記者在今日(周四)中午12點左右，在北京月壇南街港澳辦門外「做扒」(Stand-upper記者持咪在新聞現場報道)，做做吓見王光亞外出，自然撲埋去做獨家訪問，王相當合作，講了一堆政制問題，包括公民提民是否符合《基本法》之類。
有線做到獨家新聞，行家睇到自然起哄，急call記者到港澳辦門口死等，希望等到王光亞。結果皇天不負有心人，等到12點9前等到王光亞回來，而且講出更有汁的內容；以後特首述職不只報成績，還要報不足。大多數記者走咗隻雞，點知捉番隻更大隻的聖誕火雞，王主任都算有交代囉。
記者做到故仔開心之餘，資深老油條不禁要問，點解咁易等到王光亞? 港澳辦內部有飯堂，上午11:30放飯，王主任三扒兩撥食完，12:00點行出街買吓嘢都唔係好出奇，事實上佢回來時手上真係揸住個背心袋買咗啲嘢，有行家仲話見到買咗雞蛋，聞說就係行過港澳辦對面馬路的超市行咗個圈。
問題是今早CY還在港澳辦開會，中午時門外好可能仲有記者，一般中央官員都唔鍾意俾香港記者纒住問嘢，所以即使平時會就咁行出街，呢啲風頭火勢的日子都係坐車出去為妙。退一萬步講，佢事先唔記得，咁好彩/唔好彩遇上記者，都可以邊行邊答(內地官員好興如此)，答兩句就走，點會咁企定定任問? 再者佢答完有線一次，知道有記者在場，唔想再答，都可以叫司機在外面接，唔使再行返港澳辦時被記者截到，要再企定定答一次。唔好忘記，王主任是在第二次比較人齊時，才講更重要的內容。
結論只有一個，好似靚女遇上男孩子，以為係偶遇，其實早就設計好了。王主任根本就想同記者講嘢，而且主調就是特首述職規範化，所以製造這個偶遇的機會，把重要的訊息，用較不經意的方法公布，公關手段真係高呀。
巴士的團隊
