平安夜肥胡不平安，會計師公會整劑杰嘢佢嘆，公布裁定佢專業失德，相信肥胡食火雞都無味了。
但話肥胡事前毫無預感，卻又言過其實。這單嘢由２００３年開始調查，搞了１０年以上才有結果，本周一已把結果週知各有關人士。之前肥胡沒有親身出席紀錄聆訊，只由律師代表出席，不過從雙方的律師陣容可見，大家都係用資深大狀，代表肥胡的是 Mark Strachan，代表會計師公會的是Peter Duncan，出咁重磅人馬出席一個專業團體的紀律聆訊，理由只有一個，就是預咗將來會打官司。
會計師公布預哂判定肥胡專業失德後，他會上法庭申請司法覆核，所以早就派資深大狀代表，而紀律委員會主席林孟達(Kumar Ramanathan)本身，也是一個資深大狀，按道理都做咗相當工夫，防止肥胡司法覆核成功。
如今還有一個尷尬位，就是肥胡是去年才當選的全國政協常委，按內地規格呢個位等同部長級，地位崇高，如今肥胡突然被本身的專業團體判定專業失德，呢個裁定唔係輕，雖然估計全國政協不會在屆中換人，但係咁搞都唔係幾好睇啦。
Ariel
** 博客文章文責自負,不代表本公司立場 **
維基一招絕地翻身，平平哋買咗個流動電視牌，撞正普天同慶的聖誕節，賀一賀之餘，仲盛傳佢為配合24小時新聞台，向無綫新聞小花挖角，疑似對象黃紫盈、陳嘉欣、盤翠盈這三位主播BB。
問過無記新聞經理明姐有咩對策，佢即時耍手擰頭叫我地去問外事部發言人，聽聞內部公開個個都唔認收過挖角招攬。
不過，維基要挖角睇嚟出手都要高啲，依家TVB有大約十多名主播，負責24小時新聞台報新聞，年資較淺者底薪雖然不算特別高，都係萬幾至二萬。但如果在翡翠讀新聞係另外按每個騷(新聞時段)來計，條數都幾襟計，例如六點半主播每個騷過千銀，晨早新聞都有成千銀，當然要讀足成兩個幾鐘，辛苦好多，如果讀足一個月，收入分分鐘再多兩萬銀。
仲有BB們若主持吓新聞透視或者其他海外新聞節目都另外計錢，睇嚟魔童要挖BB們出手都要四、五萬囉。點解以騷計，其實都算係傳統遺留的問題，就算係弱台亞記，在本港台讀新聞都係另外計錢，一旦成為主播，每月收入多幾千到萬幾都有。
記者有得坐上主播台，唔單止係身份地位的象徵，仲連帶銀包都肥埋，所以有咁多明爭暗鬥都難怪。
但後來開台的有線同NOW新聞台就唔同，主播的薪金劃一一個銀碼，唔似得無記同亞記咁好搵，有線同NOW新入職無經驗的主播一般都係萬三、四。不過就無特別條款要過冷河，唔知魔童會唔會諗吓佢哋。
當然做主播唔會淨係睇銀碼，最重要都係份工有滿足感，維基咁有創意，都可能係一個吸引點，如今距離開台仲有半年，睇吓維基會唔會有咩新招攬人才，睇嚟無記新聞阿頭花哥(袁志偉)，要穩住士氣都有排頭痕。
