陳文敏事件難搞大

港大法律學院前院長陳文敏在報章撰文發炮， 指左派報章近期對他作「瘋狂式的攻擊」， 相信原因之一是傳聞他可能出任大學副校長。 他指這是嚴重干預院校自主，企圖遏制言論自由的行為。  

港大有好多個副校長職位， 過去其中一個副校長李焯芬教授和阿爺關係較好，他退下後朝中無人。 傳聞去年有建議陳文敏接任副校長職位，在港大高層已有不同意見， 後來阿爺見到佔中時港大法律學院扮演的角色，自然唔多奶奇。

政壇中人話，左派報章在去年11月已開始向陳文敏發炮， 但他一直忍隱不發，到最近突然高調發炮還擊， 估計和這個副校長的職位角逐有關。

有人將此事件和當年鍾庭耀的港大民調事件比較，話會唔會爆出大鑊 ? 但政壇中人話，鍾庭耀事件有明顯的著力點， 因為事涉特首辦的路祥安，矛頭指向政府， 又涉及受干預的港大校長鄭耀宗，事件一鬧大， 就想拉路祥安和鄭耀宗下台，當然背後是針對特首董伯伯。

佢認為今次陳文敏事件比較難搞大，陳將矛頭指向左報， 但現實上好難話拉左報老總落台，或者叫阿爺問責， 左報隨時可以用「新聞自由」做擋箭牌，唔易入手。加上項莊舞劍， 似乎志在爭位，而唔係搞大件事喎。

Ariel

** 博客文章文責自負,不代表本公司立場 **

政府為保在立法會財委會通過創新及科技局，抽起財委會四項議程， 讓路予創新及科技局，激進泛民矢言要拉布垮創科局， 今就到決戰時刻。

泛民一直在財委會拉布，政府想在2月通過成立創科局， 昨日唯有拉起排在創科局撥款前的幾項議程， 包括漁業發展貸款基金，等財委會今日可以全程討論創科局。

大舊陳偉業今早在電台講，泛民會全力拉布，可以提休會、 提終止待續動議、不斷問問題，然後按財委會會議程序37A條， 臨時提出大量修訂，拖垮撥款申請。

不過泛民27個議員亦唔係咁齊心，因為代表科技界的莫乃光， 已表現支持動議，所以多數只係激進泛民去玩，其他睇吓戲。

今日財委會會議有六節，是否能通過創科局， 要考財委會主席張宇人的功力，平時張宇人都俾泛民問問題， 但去到最後決戰時刻，必定要剪布，否則會議會開到沒完沒了。 上屆財委會主席吳亮星就係因為功夫差，剪布剪出大頭佛， 又唔知張宇人剪工如何了。