金多寶說故事 第八回
但聞嬰靈綣母緣 奈何橋上待重逢
「我有個朋友細個落過仔呀，啲神功師傅話呢，啲嬰靈係點都唔會走，到個阿媽死果日，都會响地府等番個阿媽架。」聽完老友咁講，到而家都仲驚驚地。
因果就係咁，响人生中，越要逃避嘅野，其實越要面對。我有個同學仔，佢二十歲果年想落仔，我有勸佢生出來，停學一年，最終佢都係去左落仔。事隔幾日，佢日有所思，夜晚打比朋友哭訴，話夢見一個細路仔叫佢媽媽，話下面好凍要求燒啲衣紙。事情好有畫面，而我就係當時接電話果個朋友仔，時間係零晨一時五十分，屋企漆黑一片嘅我，當下驚到入晒血。後來呢位同學仔太自責，精神錯亂，間中失常大喊大叫，而家咁老都仲未嫁得出。
「心理影響啫，邊有咁多鬼？」實有人咁講，我都咁講去安慰過其他人。我冇方法講得明白鬼係點樣，但萬物皆有生命，只消喚醒它的靈魂。點喚？原來係隊冧人地果一刻。我有個好朋友，細個見佢阿嫲劏雞殺鴨，一野剪落啲魚度劏開肚，佢果陣唔識性，攞把較剪一野剪死左屋企條金魚，佢啲兄弟姊妹一齊同佢講番，响條魚死果刻，牆上面出現左一個魚形嘅黑色影。
咁人呢？大人又好、細路又好，死左，仲識番黎揾人、等人？金宵大廈啲劇情，唔係人人接受。我老友話，佢個叔仔係啲好勁嘅茅山師傅，有次佢太婆過左身，要請佢上番神位供奉。於是佢叔仔出馬作法，幾個人十幾隻眼，望住一支燒到得番手指甲咁短嘅蠟燭，上面啲火忽然燒到2隻食指咁高，原來係代表佢太婆番左黎！同時間，閂好左嘅廁所門，自己識拉番開再大力閂埋，在塲嘅人，緊張到大氣都唔捨得抖。佢叔仔話，鬼係有力量，可以郁動啲野，例如開燈閂燈。我金多寶又諗起葵涌村間屋，大門口對上天花板盞燈，每星期一定燒一盞。（詳情參閱金多寶說故事第六回）所以人死後化成嘅鬼，係有力量，又有意識去做自己想做嘅事。
我金多寶覺得，能夠生存，係一件好幸福嘅事，亦都希望每個人都得到幸福。
香港兔蘆術數學會
** 博客文章文責自負,不代表本公司立場 **
