這個周末香港政界為元旦日遊行同全民投票各說各話，失驚無神周六中午有內地網民在微博貼出，習大大(內地網民對習近平的暱稱)去咗一間平民餐廳食豬肉包，搞到內地網絡瘋傳。
周日仲有手機拍的短片流出，見到習大大先睇吓有咩食，最後決定點咗鎮店的豬肉大蔥包同炒肝，之後又睇嚟睇去，叫咗碟芥菜，再在衫袋度攞錢出來，數吓數下埋單….如果真係經過精心設計，可以話出自高手中的高手喇。
更高手啲係內地朋友傳來的一個段子，解釋習大大去慶豐包子舖的原因，真係好絕：
慶豐就是兩袖清風，
炒肝就是要炒幹部，
芥菜就是告誡貪官們要戒財，
豬肉大蔥包子就是要一清二白，
21元就是不管三七二十一，一定要反貪到底！
去慶豐是兩袖清風，普通話”慶豐”同”清風”發音相近，兩袖清風寓意沒有貪過的官員，炒肝係北京的一種傳統小吃，以豬肝、大腸，配以蒜頭，打個芡，又估唔到同「炒幹部」可以拉上關係，至於白滑的大包，又真係幾一清二白，最絕係21元找數都諗到可以點解。
睇怕創作到呢個段子的人都應該幾心思細密。一場小小親民秀，引發好多想像，我哋周六時就話習大大打民意牌，係闖改革關，話口未完，習大大真係做咗全面深化改革領導小組組長，一單新聞背後有時真係幾多信息。
巴士的團隊
Ariel
** 博客文章文責自負,不代表本公司立場 **
