港視為講過"無Plan B"解畫

聖誕新年，出遊高峰期，由小市民到風雲人物都會放假輕鬆吓，失落免費電視牌照，最近又憑流動電視令港視復活的王維基都行開吓，出外放假，原來他習慣每年呢個時間都同屋企人旅行。

雖然維基放假，但港視消息無靜過，好似港視上周交易完成後發出的公告透露，港視早在政府發出兩個免費電視牌照前兩個月，即係今年八月十六日已與中移動簽咗收購協議，有質疑認為魔童係咪有隱瞞收購，實情早有「Plan B」，失落免費電視牌照就裁員三百人，到上周又話請番佢哋。

今日有評論就覺得維基應該解吓畫，點解失落免費牌照時堅持自己無「Plan B」，應該向市民交代。

查實若果真係八月已簽約，港視係上市公司點解唔披露呢？

呢個質疑可大可小，睇怕放假的維基都應該心掛掛，公關更是忙於解畫，重申港視原本計劃流動電服務只屬輔助性質，包括服務裝置及網絡覆蓋。雖然在八月達成協議，但沒有雙方必買必賣的約束力。政府在10月15日公布港視申請不獲接納，以當時情況和形勢，無把握能完成與中移動的交易。

睇嚟呢個聖誕維基係咪可以輕鬆放吓假就好難講，但港視的公關就肯定俾傳媒追到暈。

巴士的團隊

Ariel

** 博客文章文責自負,不代表本公司立場 **

平安夜肥胡不平安，會計師公會整劑杰嘢佢嘆，公布裁定佢專業失德，相信肥胡食火雞都無味了。

 

但話肥胡事前毫無預感，卻又言過其實。這單嘢由２００３年開始調查，搞了１０年以上才有結果，本周一已把結果週知各有關人士。之前肥胡沒有親身出席紀錄聆訊，只由律師代表出席，不過從雙方的律師陣容可見，大家都係用資深大狀，代表肥胡的是 Mark Strachan，代表會計師公會的是Peter Duncan，出咁重磅人馬出席一個專業團體的紀律聆訊，理由只有一個，就是預咗將來會打官司。

 

會計師公布預哂判定肥胡專業失德後，他會上法庭申請司法覆核，所以早就派資深大狀代表，而紀律委員會主席林孟達(Kumar Ramanathan)本身，也是一個資深大狀，按道理都做咗相當工夫，防止肥胡司法覆核成功。

 

如今還有一個尷尬位，就是肥胡是去年才當選的全國政協常委，按內地規格呢個位等同部長級，地位崇高，如今肥胡突然被本身的專業團體判定專業失德，呢個裁定唔係輕，雖然估計全國政協不會在屆中換人，但係咁搞都唔係幾好睇啦。