北京人大政協兩會又開鑼，政壇友當然關注在會議期間，國家領導人會傳遞出咩嘢訊息。一開波，中央港澳工作協調小組組長、全國人大委員長張德江即刻見咗港澳區政協委員。從近期香港的反水貨客衝突，到持續79天的佔領活動，張組長都有提及。
據了解，張組長在會上話，過去一年，香港有兩件大事好值得一提，一是去年人大831有關香港普選特首的決定，佢指出全國人大常委會規定了香港行政長官普選的核心要素和制度框架，為香港實行行政長官普選奠定了憲制基礎，呢個係香港民主發展進程中具有里程碑意義的一件大事。
第二件大事，當然係持續長達79天的非法「佔中」活動帶來的衝擊，佢話各方堅定立場、堅守原則、堅決鬥爭，依法穩妥應對，最終成功平息了這場高風險的街頭政治活動，捍衛了香港法治，維護了大局穩定。特別是整個處置過程沒有發生嚴重流血衝突，沒有發生死亡事件，在世界各國各地區處置同類事件堪稱範例。
佢仲話如果香港亂了，最後埋單的是港人，受傷害的也是香港。
聽完張組長的講話，港區政協委員都覺得，中央肯定特區政府同警隊處理佔中活動，亦都顯示831決定唔會改。而全國人大法律委員會主任委員喬老爺，今日在北京回應記者追訪時亦清楚表示，人大常委會就香港政改框架的決定，沒有任何改變空間。
政壇中人話，聽阿爺咁講，佢地對處理成個佔中的手法高度評價，去到「範例」的高度，由此推算，中央比較滿意特區政府的表現，亦滿意自己企硬的表現，想佢改好難啦。
Ariel
** 博客文章文責自負,不代表本公司立場 **
港大搞新春團拜，明德學院校務委員會主席張永霖Linus都有出席，佢話明德學院規模唔算大，但好有抱負，希望搞好間學校，佢仲同Ariel講港大呢間百年老店的改革問題！
Linus話自己對港大愛之深，責之切，希望港大愈做愈好，做過港大校務委員會委員的張永霖話，約十年前港大轉咗選院長形式，由以往由學院內部選人，改為全球招聘，咁做似乎係公開透明啲，點知請返嚟的院長做起事嚟，經常受到制肘。
佢話收過一位由馬來西亞嚟、曾喺MIT(美國麻省理工學院）做過的工程學院院長投訴，話做院長無得發揮，覺得好無癮，Linus認為喺時候檢討吓院長扮演咩嘢角色。佢話港大中央同學院之間的工作關係和財政管理規矩同樣不合時宜，都要檢討吓。
Linus以喺大東電報局打工做例子，話身為大東首位非英國人董事，但睇住大東因管理不善，悲劇收場。大東喺1870年代，已經將電纜由英國鋪到去上海，但而家已經接近喺市場上消失，由此證明任何傳統機構要生存，就要進取、有表現、與時俱進才成，港大亦然。
張永霖自稱係港大「改革派」，但跟口又講笑咁話「改革派通常無咩好收場！」
Linus仲話不論點改革都好，都要喺學術自由、學術表現同社會責任中取得平衡，尤其是港大每年得到政府咁多資助，好應該搞好間學校﹔亦唔可以學術自由為理由，掩飾追求學術表現。
雖然Linus講到港好似問題多多，但同時亦都話港大同樣有好多年優傳統，一樣要好好保存。對近期鬧得熱哄哄，港大招聘副校長引起的爭議，Linus即刻耍手擰頭，話唔會評論啦。
