張永霖大談港大改革

港大搞新春團拜，明德學院校務委員會主席張永霖Linus都有出席，佢話明德學院規模唔算大，但好有抱負，希望搞好間學校，佢仲同Ariel講港大呢間百年老店的改革問題！

 

Linus話自己對港大愛之深，責之切，希望港大愈做愈好，做過港大校務委員會委員的張永霖話，約十年前港大轉咗選院長形式，由以往由學院內部選人，改為全球招聘，咁做似乎係公開透明啲，點知請返嚟的院長做起事嚟，經常受到制肘。

佢話收過一位由馬來西亞嚟、曾喺MIT(美國麻省理工學院）做過的工程學院院長投訴，話做院長無得發揮，覺得好無癮，Linus認為喺時候檢討吓院長扮演咩嘢角色。佢話港大中央同學院之間的工作關係和財政管理規矩同樣不合時宜，都要檢討吓。

Linus以喺大東電報局打工做例子，話身為大東首位非英國人董事，但睇住大東因管理不善，悲劇收場。大東喺1870年代，已經將電纜由英國鋪到去上海，但而家已經接近喺市場上消失，由此證明任何傳統機構要生存，就要進取、有表現、與時俱進才成，港大亦然。

張永霖自稱係港大「改革派」，但跟口又講笑咁話「改革派通常無咩好收場！」

Linus仲話不論點改革都好，都要喺學術自由、學術表現同社會責任中取得平衡，尤其是港大每年得到政府咁多資助，好應該搞好間學校﹔亦唔可以學術自由為理由，掩飾追求學術表現。

雖然Linus講到港好似問題多多，但同時亦都話港大同樣有好多年優傳統，一樣要好好保存。對近期鬧得熱哄哄，港大招聘副校長引起的爭議，Linus即刻耍手擰頭，話唔會評論啦。

Ariel

** 博客文章文責自負,不代表本公司立場 **

人大政協兩會又開鑼，會前盛傳民建聯主席譚耀宗會增補做政協常委，結果並未成事。知情人士話之前的確認真傾過，喺屆中增補一名港區政協常委的事，民建聯譚Sir亦係不二之選，但呢件事到最後無疾而終，真正原因未明。

不過有政壇八卦友就話，呢件事傳得出街，都有少少負面意味。大家都知道好多商界中人，都想爭做政協常委，喺上屆政協換屆時搶唔到，而家喺屆中突然傳出考慮緊搵譚Sir做常委，相信聽到的人都不是味兒，結果件事傳到沸沸揚揚，或者無疾而終未必一定係「見光死」，但好多人唔歡迎呢個消息就係事實啦。

照依家走勢睇，再喺屆中增補人入去做常委機會好細，可能要等到正式換屆之時，睇吓港區政協常委有幾多空缺走出嚟，到時再去爭過。不過由於好多人想坐上呢個位，預料到時爭逐都會非常激烈。正如上屆有啲入唔到政協常委的人士，都不斷喺傳媒面前放料，搞到滿城風雨，相信來屆情況都唔好得幾多。