多家傳媒昨日引述「接近中央的權威消息人士」話， 若政改方案不通過，梁振英極有機會連任，並重推廿三條立法。 此說招來立法會主席曾鈺成狠批。
曾鈺成今朝話，留意到有報道指一名「權威建制派人士」提到， 若政改方案不獲通過，梁振英將會連任行政長官，並就23條立法。 曾鈺成認為將梁振英連任和23條立法說成災禍， 在中央眼中是政治上非常不正確， 他絕對不相信是權威建制派人士所說， 亦認為這番說話對通過政改沒有幫助。
曾主席鬧得好盡，話這番說話若出自泛民中人，並不奇怪， 因為泛民有人反對梁振英，亦反對23條立法， 但如果中央政府真的讚賞梁振英擔任特首的表現，同時認為應就23 條立法，該名人士的說法就「等於打中央兩巴」咁話。
政壇中人見到曾主席咁講，覺得背後有玄機。佢話留意到幾點， 第一，本來傳媒引述「接近中央的權威消息人士」， 理論上呢個排頭可以係內地或香港官員，亦可以係建制派， 但曾主席就改為「權威建制派人士」， 等如佢鎖定咗講話人係建制派唔係官員。
第二，曾主席講到對方「政治不正確」，「等如打中央兩巴」， 狠話盡出。曾主席呢招幾高，鬧對方係從中央角度出發。 政壇中人話，聽聞阿爺亦唔太鐘意那個「權威消息人士」咁講， 曾主席出招應該有一定背景。
第三，曾主席一直唔係咁挺CY，但今次好似為CY仗義執言， 而且出手咁辣，除了代阿爺發聲之外，當然亦有個人喜惡。 政壇八卦友話，曾主席最唔鐘意啲建制派高層人士， 特別係女性又想選特首嗰隻，見你行歪咗仲唔出手？Ariel無份聽那個權威人士講嘢，只係靠估， 而家開緊兩會期間，昨日又係3.8婦女節， 會唔會有啲兩會女高層同傳媒吹吓風呢？若然係佢，曾主席唔順都好合邏輯喎。
Ariel
** 博客文章文責自負,不代表本公司立場 **
