行政會議特別會議傾亞視生死，由下午1點開到4點半，足足3個半 鐘，淨係傾一個議題搞咁耐， 係因為需要全面審視通訊局之前每一個步驟都合法合規定， 即係特首所講「合乎程序公義」， 包括埋如何處理亞視新提交的條款協議書等。
另一個討論的焦點，係善後工作，包括消息公布後亞視萬一停播， 點樣應付，如果亞視馬上唔玩，電視台700多名員工的出路安排等等一連串預案，勞工及福利局局長張建宗都有出席今日會議。各樣變數都好多，政府成立跨部門工作小組，減低相關負面影響。
除了政府，相關各方其實都有做咗預案。 亞視目前與無綫共享全港多個山頭發射站轉播訊號， 無綫內部亦有安排，確保萬一亞視唔玩，唔會影響無綫的轉播能力， Ariel昨日已提過，亞視在欠薪期間周圍撲水，已向無綫出售山頭發射儀器，而且過去一段時間， 亞視的發射站成日欠交電費，似乎都冇乜心機打理。
馬迷最關心的係賽馬及市民關心的六合彩直播， 據知馬會亦有同相關電視台有共識。 發言人話依家同亞視的轉播協議，有效期直至2015年7月31日 ，期望亞視會繼續執行協議下的轉播安排。因應政府今日的宣佈， 馬會將會為下一個賽馬年度的賽馬節目和六合彩攪珠的轉播事宜作出新的安排，以確保有關直播不受影響。
Ariel
** 博客文章文責自負,不代表本公司立場 **
行政會議終於決定了走過半世紀的亞視命運，由昨晚亞視突然單方面宣布主要股東王征會將亞視股份賣俾王維基，到今日王維基的港視澄清同亞視無達成協議，再到下午亞視經理人德勤開記者會，宣布王征及黃炳均今早約11時已經與一投資者簽署條款協議書，出售亞視52%股份，一個月後將正式簽署買賣合約。事件千變萬化。
就在德勤2點召開記者的同時，原來行會已就亞視的前途開緊會，今次決定其中一個關注點係德勤最後宣布的這份條款協議書，能否成為救亞視的最後一續命燈。
據了解，同亞視簽條款書的係曾入標洽購亞視的買家之一胡景邵，協議作價5.5億，分期支付。首期5千萬，買家可以隨時取回；第二期一個月後等亞視獲政府續牌後，才支付3.5億；第三期一年若無其他問題再俾1.5億。最後如果3年亞視達50億市值，再多俾1.5億。
政壇高人認為，成個條款書，並不實質，例如第一期5千萬俾咗未，或者幾時俾呢？呢啲基本資料都無，而且首期都寫明隨時可以退回。從政府的角度，就算係昨日收到呢份條款書，頂多是一份意向書，好難接受。
仲有「特別」之處是那份條款書上的日子是3月31日，但德勤話是今天（4月1日）早上才簽。
依家睇嚟，由昨晚亞視單方面宣布賣俾王維基開始，亞視大股東似乎想力挽狂瀾，真係睇到外界眼都突埋，到今早同匯友簽下呢份條款協議書，亦都救唔到啦。
