昨日睇《蘋果日報》講起政改投票若要通過，要搵幾個泛民議員轉軚，傳中央為「撬票」，不惜威迫利誘，甚至願以1億元換1票咁話。
報道講到曾於2005年盛傳會支持政改的街工立法會議員梁耀忠，事隔10年再度被傳榜上有名。梁耀忠接受《蘋果日報》訪問時稱，難以理解當年為何被誤解，強調從其言行，外界今次亦無理由懷疑他會轉軚； 對於中央盛傳以一億元銀彈攻勢誘使泛民袋住先，梁稱不為所動，反問：「我人生仲有幾長要走，要咁多錢嚟做乜呢？」
小鯊幾個月前聽過呢個1億換票的傳聞， 但係都只是在泛民圈子流傳，我就覺得太離題，中央係有錢，但唔會出5、6億咁去買票，否則被爆咗出來，成個制度都會破產。 退一萬步，唔理邊個，即使有人出1億買1張票，我都好懷疑今時今日有無議員敢收，唔係話無人貪錢，而係經過許仕仁案，議員身為公職人員仲去收錢，真係想坐監呀？
呢個「億元買票」的傳聞好out啦，最新傳聞係政改一係唔通過，一通過就係泛民大面積通過咁話。咁離奇，聽落呢個講法實在難以想像，即係話要泛民主要政黨轉軚，才會大面積通過。
若要理性分析出現呢個局面的可能情況，就係泛民政黨心知呢個有得普選的政改方案甚實對佢地最著數，唔支持唔得。不過政治講理性分析好多時行唔通，轉去講陰謀，就要講到華盛頓DC啦，難道佢枝指揮棒真係咁勁，一指泛民就要跟？小鯊對呢啲講法，暫時都係當奇聞咁聽囉。
小鯊
** 博客文章文責自負,不代表本公司立場 **
壹傳媒旗下壹週刊昨日率先傳出裁員及減薪。 行內傳聞老細要壹週刊減20%開支，所以裁員減薪一齊來。
傳聞裁員人數或高達50人，昨日先郁壹仔Book A時事組，派大約20個大信封，做潮流科技新聞係重災區， 全部要起身，另外被炒員工以年資長、人工高者居多。估計Book B 娛樂組及Book C 美容時尚組派大信封的日子都為期不遠。
另外編輯或以上高級員工要減薪，傳聞減幅約5％， 因為月入萬幾銀的基層員工減都無大幫助，所以基層員工不用減薪。
壹傳媒內部盛傳，唔止壹仔要裁員減薪， 其他雜誌或報紙都陸續有類似行動，壹傳媒英文名叫Next， 而家大家問緊What’s next?
壹傳媒遇到的是報業收入下跌通病，但以壹仔的病情較嚴重。 睇番壹傳媒至去年9月的上半年業績報告(全年業績未出)， 佢報紙雜誌的廣告都跌得好厲害，尤以雜誌為甚。 壹傳媒報章雜誌去年上半年收入合共大跌2.2億，跌至8.5億， 整體跌幅高達20.4%，此收入包含廣告和發行收入， 估計主要是廣告收入下跌拖低數字。
拆開嚟睇，香港蘋果日報上半年收入3.3億，較對上一年同期跌2 1.4%，半年唔見咗8950萬。當中半年廣告收益1.9億， 較對上一年同期的2.6億，大跌26.7%，半年唔見咗7000 萬廣告。去年上半年香港蘋果發行收益1.4億，較對上一年同期1 .6億，跌12.5%，跌了2000萬。 香港蘋果日報上半年廣告收入大跌26.7%， 此數字可以用驚人來形容，以此估計蘋果日報2014年度全年廣告可能唔過4億，以佢早兩年廣告還有6億去計，廣告跌得極急。
雜誌方面，忽然1周半年總收入(包含廣告和發行收入， 兩者沒有分開披露)1.14億，跌20.5%。壹週刊半年總收入 1.03億，比對上一年同期跌13.8%。Face雜誌半年總收 入4280萬元，比對上一年同期跌9.9%。忽然1周作為壹傳媒收入最高的旗艦雜誌，但收入跌幅20.5%也是最大，非常之傷。
壹仔唔係跌得最甘，已經要裁員減薪， 跌得比佢多的忽然一周和香港蘋果日報，睇嚟都避唔過呢刧，可能減開支20%，係佢系內各報刊都要達到的目標。 以壹仔去年上半年總收入跌13.8%，即使2013年度本來賺少 少，2014年度都馬上變蝕啦。假設人工開支佔壹仔4成開支，減 20%等如減總開支的8%，都未追到收入下跌， 仲未計去年廣告跌完今年2015年度廣告可能仲要再跌， 條數真係唔易計得掂。
