六叔(邵逸夫)離世，這位TVB的永遠精神領袖，死訊傳出，自然成為電視城頭等大事，難免引起討論。
六叔享年107歲，在普通人眼中算是笑喪，雖然近年身體狀況已不如前，但一向予人印象是身體還可以，到底這位長壽老人過不了什麼劫呢？
電視城內昨日議論得最多的是剛過去的11月19日無綫台慶夜，一批不滿無記的團體到將軍澳電視城外抗議「一台獨大」，示威抗議在香港見慣不怪。這批示威者就以中國人頗忌諱的方式，在電視城外大灑「溪錢」又用吊臂車升起大型對聯「今日新牌歸故土，他朝霸權也相同」，猶如一場傳統喪禮那樣去搞示威。
原來11月19日不止是無綫台慶，亦是六叔的生日，他一手創辦無綫電視時，特意選擇了自己六十大壽那天作為啟播日，生日就是台慶，等如以後每年全台上下為他祝壽。
據聞電視城中，呢兩日不少人竊竊私語，在生日之期被人搞場咁嘅大龍鳳，都咪話唔係「大吉利是」，如今生日過咗無耐，六叔就仙遊，傳統一啲嘅人都會有聯想，佢係唔係俾人咒死呢？有人就直頭覺得贈興還贈興，點解要喺人家生日搞到擔幡買水呢？
Ariel
** 博客文章文責自負,不代表本公司立場 **
邵六叔係娛樂大亨，捧星自有其慧眼，單看他在邵氏的年代捧紅幾許紅星，就知他在娛樂圈獨具慧眼。
曾在無記任職者話，邵氏年代的男女紅星，我輩印象不深，但無綫的藝人，甚至無記新聞部讀新聞的主播，大家印象就會深啲，其中一個最經典的是而家新聞部大佬花哥(袁志偉)，佢就係俾六叔睇中，大力捧紅。
花哥做主播的時候，甚有觀眾緣(那時還叫花仔)，佢除咗靚仔之外，仲有過人之能，其他主播係讀稿，睇住鏡頭下面一個鏡位反映出來的提示字幕照讀(那個提示設備叫autocue)，但花哥有過目不忘的本事，根本係記得要讀的內容，不用睇autocue，所以講得流暢自然，唔似睇字幕的主播有點「眼坦坦」的感覺。花哥還有一樣特殊技能係做直播，不理要等幾耐，只要畫面不停，他也可以照講如儀，絕無冷場。
邵六叔肯定有娛樂圈用人的直覺，所以這樣睇好花哥，力捧他做師奶殺手。不過花哥也曾有失意的時候，話說有一段時間當時新聞部的總監吉叔(黃應士)離巢，由鄧惠鈞和曾景安主政，花哥和新老細行得好埋，到後來吉叔再回巢掌政，一度想炒花哥，但是六叔親自出力保佢，結果吉叔只能叫花哥坐埋一邊，轉去搞咗一輪新聞透視，但保住個位，之後才可以敗部復活。
六叔識得睇人，先至捧得出明星來。
巴士的團隊
