Steven 講 文王卦（子女升學篇）
前言：作為父母， 除咗著重子女健康之外， 相信最為緊張係佢地既學業成績同升學問題。
我依位朋友就為咗佢讀緊小學既女升唔升到 5A 班而感到好困惑。 由於A班係全級唯一尖子班， 上到5A就直升 6A。 對將來畢業既成績同揀中學既策略尤關重要 !
眼見亞女 HEA 下 HEA 下咁，其他同學仔就緊張到差 1分都喊到死去活來，作為媽媽既除咗不停督促，都唔知可以點幫到手，非常煩惱。
朋友知我學文王卦，叫我幫佢占一支，睇下亞女有無機會升到。
—————
內文：本卦風地觀，變卦水地比。以官鬼爻作考試運，父母爻作成績，子孫爻為亞女，世爻為我朋友。
此卦獨發於上爻，重點落喺依到。變爻子孫子水唔旺，代表亞女能力不算超班，但回頭生財爻卯木，加大財爻力度去生五爻官鬼巳火，加上值日，日子力量最大，官鬼非常旺，判都可憑一己之力考好個試，考試順利。
官鬼爻生父母爻。雖然官鬼爻無發動，但由於日子亦為巳火，故併落去睇。父母爻得到重重相生，加上月建來合，有生有合為大吉，升尖子班無難度!
朋友本來都只係半信半疑唔放心，直至午月尾出結果知道順利升尖子班先放下心頭大石。
—————
結果反饋：
朋友：「其實都入得好險, 佢排最尾咁濟。」
我：「入到就得啦！」
朋友：「佢既學習態度真係令人好擔心。」
我：「話時話，支卦世爻持朱雀，
妳係咪對個女好勞嘈架？」
朋友：「有邊個阿媽唔勞嘈架？」
嗯，我諗返自己亞媽，諗下自己老婆
...................咁又係.................
香港兔蘆術數學會
** 博客文章文責自負,不代表本公司立場 **