博客文章
有消息話若泛民願意投票通過政改方案， 中央可派高級官員在立法會表決前公開澄清，2017方案並非終極 ，只是「袋一屆」，不是「袋一世」。 各方對此說法回應都相當審慎， 政制及內地事務局局長譚志源拒評有關報導，但重申政改方案不會「 袋一世」。
Raymond譚話，即使通過政府提出的政改方案， 若日後需要對基本法附件一作出修訂時， 都可以根據五步曲進行政改。Raymond譚的答案雖然大路， 但都說明了按憲制本來就隨時可以啟動五部曲修改，從無話袋一世。
泛民中人就話，對有關報導的說法難以接受。政壇八卦友話， 如果泛民因為呢個「承諾」就可以食，咁就無謂講咁多嘢啦。
八卦友話，如今已到趕羊入欄的最後階段，要食就食，唔食就拉倒， 都唔係作乜嘢微少承諾，可以改變大局。泛民食唔食得落， 就要自己計數啦，唔食錯過了搞普選的機會，食又要面對激進派狙擊，都唔係咁易決定。
Ariel
** 博客文章文責自負,不代表本公司立場 **
近月股市興旺，豪宅市場都郁郁地，財爺曾俊華昨日亦評論樓市，話2月金管局出招收緊樓按後，交投轉趨淡靜，樓價升勢放緩，政府同時增加住宅供應，未來數年私人住宅供應增至新高78,000個。財爺更打開口牌，話若有需要，政府將再推出適當措施，維持樓市健康平穩發展，呼籲市民決定置業前小心衡量風險，量力而為。
財爺講到有需要時再出樓市辣招，大家都當無到，固然無報紙做頭條，市場今日亦無反應，好似股市今日跌130點，即係跌0.5%，但地產股無跌，新鴻基地產仲逆市升0.8%，恒基就無起跌。睇嚟市場都對政府啲辣招麻晒木，聽到話再出招都當無料到。
恒基李四叔在股東會上講到樓市，話本港樓價比外國貴很多，以同樣是鄰近市區的樓宇相比，本港樓價比內地貴十倍，雖然政府大力建樓，日日覓地起樓，但因建築費貴及工程需時，將令樓價即使有波動， 但無論升跌幅也會有限，預計樓市進入牛皮狀態，希望可健康發展。他認為政府不用再出辣招咁話。
李四叔講嘢一向大膽，佢更預言政改方案若能通過，恒指可以升到3萬點，佢會因此每年捐10億作慈善事業。
傳媒喜歡計數，好粗略咁計若然方案通過，四叔捐足10年錢的話，即係有100億，當每個低收入人士幫佢1萬元，可以幫100萬人喎，咁議員通過政改咪等如大做善事？
