最近一次「《巴士的報》送大禮」活動問過大家小時候最鍾意食咩零食，得到多人讚的留言將會獲得近期超Hit嘅「迷你兵團的嗒糖」。轉眼間又到公布結果嘅時候，一齊嚟睇睇得獎結果，順使懷緬一下童年回憶！
Sony Li：呢隻幾想食返！入面好似一邊白一邊啡色。
點擊看圖輯
網上圖片
網上圖片
網上圖片
網上圖片
網上圖片
網上圖片
網上圖片
網上圖片
網上圖片
編按：結漣軟糖以前可以喺國貨公司同埋士多買到。通常都會裝喺玻璃樽內，塞到滿，要買嗰陣就同事頭婆講要幾條。食落好似咬香口膠咁，但係咬咬吓又會消失唔見晒。現在已經無得賣。
網上圖片
Ka Tky：小時候每當放學，我和小學同學買一條，一人一半，是很簡單的幸福。
編按：呢種雪條本來叫做「對對棒」，不過通常都叫「孖條」，時至今日都仲可以喺便利店搵到。細個時兄弟姊妹嗌交嗌得幾激烈都好，阿媽買支一開二，兩個人都會立即收聲。佢嘅另一用途就係追女仔，男同學請女仔食雪條，識得買一定係買孖條！
網上圖片
Yeung Sun Say：細個最鍾意食咩？緊係可以同同學仔借宿一宵既粟一燒啦！又係燒粟米咁橋，一早知你係粟一燒！
編按：粟一燒其實本身無咩特色，只不過就係粟米條加唔同味粉。不過就憑佢最初推出嗰幾個廣告引起話題。片中有個人扮成一條粟米，做埋晒啲騎呢嘢，最後搞到自己燒燶咗。呢個時候就會聽到葛文輝把聲：「又係燒粟米咁橋，一早知你係粟一燒！」以下係「有支栗米上太空」版本：
Akira Wong：明治彩絲糖（Chelsea）。以前細個呢隻糖好貴，要儲幾日錢先可以買到，乳酪和咖啡味最好食。雖然偏甜，但以前一買到，就同同學仔一齊食，係一種好開心的回憶。
編按：明治彩絲糖包裝十年如一日，味道亦然，唔同嘅係現在香港已經無代理商入貨啦，只有專賣日本零食的鋪頭先有。由於要從日本訂貨先有，雖炙現在已經唔使儲幾日錢先買到，但係一樣唔平！
網上圖片
Erica Chingb：太空糖入口即溶，勁好味。
編按：太空糖真係唔少香港70、80後至愛零食，唔少90後都仲會食過吓，再過一代就真係無咩人知啦，皆因現在只能夠喺老式辦館同士多搵到。太空糖由最大特免就係入口即溶，變成一堆粉，味道酸酸地，吸引人食完一粒又一粒。
網上圖片
Rachel Li：唇膏糖！我嗰陣好中意扮靚但無錢買唇膏，就買個唇膏糖食食下，用支糖揩落個嘴唇到。雖然黐立立，不過搽上去啲糖會有閃令令嘅效果。可以扮唇膏，又可以食得，真係好正！
編按：呢隻糖設計好得意，好似支唇膏咁要從後慢慢推上前嚟慢慢舐。由於舐嚟食會食得好慢，所以到最後通常都係成支咬斷咗。仲有，一定會食到成手都黐立立。
網上圖片
Godfai Li：唔洗講一定係媽咪麵，邊會有細路仔唔鐘意？最正就係朋友仔食嗰時伸隻手過隔離，你實會分啲比佢。
編按：媽咪麵好重味精，但又真係超好食，所以次次食完都會好頸渴。鍾意媽咪麵仲有一個理由，就係拎住佢嘅時候，大家可以參加「藍毛毛演唱會」：「突特得，得特特，突特得特突。」
網上圖片
Irene Tsui：梗係珍珍牛仔片啦，每個小息嘅最愛。每塊蜂巢形嘅脆片都超級惹味，完全係童年回憶。
編按：牛仔片真係邪惡零食，次次都話食一塊，之後就會變咗一塊又一塊。食嘅時候千祈唔可以俾其他小學雞睇到，若然分咗一塊出去，就要預咗分晒成包架啦！
網上圖片
Ka Lam Walk Man：巨星雪條。逐層食，好好味！
編按：巨星雪條現在已經絕版，可惜！呢隻雪條一支有齊三種口味，最上面係七彩碎糖，中間係雲呢嗱雪糕，最底層係西瓜味，如此配搭真係經典。
網上圖片
Freddy Wong：吹波膠、仲有紋身貼紙玩。
編按：吹波膠好玩又好味。為咗吹出更大個波，唔少人都會一次過「啪」幾粒，唔吹到大過塊臉都唔甘心。到真係吹到好大個嘅時候，爆咗就會黐住頭髮，到時就超麻煩啦。
網上圖片
其實除咗以上十位得獎者，仲有唔少讀者都舉出其他同樣經典的零食，再睇睇佢地點講 －
Winnie Cheng：齋食Nutella榛子醬；
Sing Sing Kwok：可樂汽水粉，倒落口食，滋滋聲；
Apple Lam：雪凍左既唧唧冰：
Fiona Wong：一定係眼鏡朱古力，又食得，又戴得；
Dennis Wong：識食緊係食萬里望花生啦；
Ki Sum Cheung：一盒盒既蝴蝶糖；
Emily Lam：寶路薄荷糖，有個窿既薄荷糖；
Ling Ling Wang：煙仔朱古力；
Fong Fong Ng：鉛筆糖。幾個同學仔小息係咁搓支糖，睇下邊個刨得尖啲；
Yeeman Ng：BB糖，有聲出，唔識吹口哨都扮識。
