自稱公民黨黨員，化名「古仔」繼續爆料，最新第六篇在網上流傳。
公民黨，究竟做緊乜？ （六）
…風聲越來越緊… 依家居然去到向全黨發出紀律通告：不得使用內地手機，例如華為，小米等，否則會黨紀處分。嘩，使唔使去到咁呀！神經緊張都唔應該係呢個方向呀，似乎要話俾人聽，或者係轉移視線，共產黨在偷聽我地黨內秘密。
事情其實好簡單，如果係針對「公民黨，究竟做緊乜？」，咁入便所講嘅一切，都係我聽到同黨都聽到嘅，又冇話過係黨內機密唔準傳出去，只不過人家唔講，我爆響口而已。既然我地都係親耳聽到，又關內地手機同電腦乜嘢事？
如果真係如此，咁「黨領導」就應該檢討反思一下，點解呢啲嘢係內部無機會表達？我地又點解會係條氣頂住？
講真，如果條氣頂住嘅只係我一個，咁反思嘅應該係我，不過，內部無論強硬派同「溫和派」，似乎都對傑哥好多睇法，咁就唔關我事啦。嗱，就以去深圳見京官件事為例，黨內古文翰、胡柏麟等「80後」成員同毛姨姨等「強硬派」，就對梁上晝「深圳見面會」同京官談政改，下午就參加遊行高呼「結束一黨專政」嘅做法好反感，認為傑哥如果真係企係泛民一邊嘅話，就唔應該去深圳見京官；人地余若薇就唔同，從來唔會因為個人利益而有任何妥協，言下之意，係諷刺傑哥只是政客一名，距離政治家風範仲有幾條街，為了博個人名利，乜事都做得出，佢講起就好罄。
講起古文翰同胡柏麟，唔妥傑哥都非自昨日始。話說2011年，公民黨在區議會選舉中無一新人競選成功，當時嘅新界西支部秘書長古文翰、黨員胡柏麟公開要求梁家傑引咎辭職，最終傑哥側側膊不了了之，呢啲完全唔係秘密，黨內人人都知。
好多位大家尊敬既前輩，依家都有啲意興闌珊，就以公民黨前主席關信基嚟講，大家會忽然覺得，好耐無聽過佢既消息。關信基就表示過：公民黨喺梁家傑嘅帶領下，所走嘅路線，主張同立場，同創黨初衷有出入，故此唔單只辭咗職唔坐主席個位，其後仲甚少參加黨內活動添。
本來大家公認最「打得」既李志喜，仲有早期既「精神領袖」吳靄儀等等一班「元老」份子，實際上都認為，冇理由對政改方案唔採取「袋住先」嘅立場，因為「政改原地踏步，不利於培養下面嘅接班人」；呢啲講法上面有元老提倡，下面有我地認同，應該好有市場，幾乎可以係黨內「權威嘅主流民意」，但係都冇計，因為最終係邊個話事，大家心照啦。
無咗關信基，李志喜又變咗李喜 -- 不得志，吳靄儀又變得低調，半心半意。仲有， 點解又會走甩咗個張超雄同譚香文？我以為係佢地兩位嫌棄公民黨唔夠激，寧願出去跟「人力」同「工黨」打打殺殺；啲同事話過我聽：你都係太老實，留意下黨內，唔係律師同大狀嘅，都唔會好穩陣，譚香文係會計界，張超雄係社福界，邊處有佢地發圍嘅空間？咁又係，否則公民黨又點樣做「名副其實」嘅「大狀黨」？
數數下剩番冇幾多個。毛姨姨又點？舊年毛孟靜私自接受媒體採訪，解釋接受肥佬黎政治獻金，余若薇一再勸阻都無辦法，梁對呢件事就極度不滿，於是毛姨姨被省到立立令；湯家驊就更加唔使講，未徵得黨內同意就拋出自己嘅政改方案，仲要拉埋郭榮鏗、吳靄儀支持，傑哥簡直係火遮眼，但係so what?
總之一句，黨不成黨，我地好無心機，否則都唔使出黎「不吐不快」。17號立法會政改方案上枱，大家心情好複雜。今回傑哥嗰句反而啱聽噃：過又死唔過又死，睇下點！。
Mark Felt
** 博客文章文責自負,不代表本公司立場 **
最近網上流傳一個化名「古仔」的人寫的文章，自稱公民黨黨員，已經寫到第五篇。
公民黨，究竟做緊乜？ （五）今回輪到，梁家傑大鬧湯家驊
公民黨開會要收手機，現在變成了常規，最新消息：不但是手機，連手提電腦都唔可以出現。搞到咁秘密，真係未見過。
上星期二（6月2日），執委會又出現奇怪現象，全部開會只有幾丁人，我地黨規向來唔嚴，故此人少少照開，好似無乜嘢quorum嘅問題。湯渣同Dennis （郭榮鏗）唔到，已經好長時間玩失蹤，大家都無預佢地，然則陳家洛唔到，郭家麒又無出現，數來數去除咗傑哥同Audrey，莫非只有毛姨姨同Tanya（陳淑莊）？
我無資格逐個去問，點解唔去開執委會，不過，大概都猜想得到，起碼有一樣肯定嘅，就係大家心情都好差，稱得上各懷心事，傑哥Audrey又話晒事，大家都唔順氣。我入來咁耐，未見過如此尷尬的政治處境，然而，政改咁大件事，傑哥，湯渣，Dennis同Audrey日日喺外面講咗咁多嘢，信不信由你，居然在我地執委會，係從來無討論啲咩方案具體內容 ！
講過5月26日嗰次會議，Audrey大鬧郭榮鏗，相隔一個星期，6月2日開會，呢勻輪到傑哥大鬧湯家驊。主要係話湯家驊倒佢米：我話咗，李飛講既說明「袋住先」其實係「袋一世」，點知Ronny（湯家驊）居然同李飛打圓場，幫佢兜番，話831決議要政改方案通過之後先至有可能修改完善，所以唔係袋一世，係袋住先。你湯家驊完全無晒立場，都唔知你幫緊邊個講嘢。可惜我不在場，否則嘅話，我一定會出聲問下傑哥：咁你嘅立場又幾時同大家討論過？我地都係喺傳媒到先至聽番咋。
以前電視賣連鎖店廣告，精靈小妹妹話：我有少少鐘意咗佢。家陣我係調轉，我對傑哥同Audrey開始有少少憎恨咗佢地。事情到咗今天田地，公民黨可以稱得上係內外交困，眾叛親離。首先要負責任嘅，應該就係梁家傑，Audrey兩個。
「萬惡權為首」，咁講唔知是否貼切，好似鬧晒所有從政者。傑哥同Audrey，一切都從「特首夢」開始。比如話，當年傑哥參加特首選舉，同曾蔭權對壘，在黨內幾時輪到我地「旁人」出聲？就算係泛民主陣營之中，對佢參選亦無甚好感，甚至可以說是「厭惡」，從一開始傑哥嘅「特首夢」就係阻力重重嗰隻。 07年佢提出參選特首，黨外泛民主陣營尤其係立法會議員都強烈反對，最終梁執意參選，大家好反感但又點，就算黨內我地總不能手指拗出唔拗入，無理由加埋把口去反對，相反更加要幫傑哥準備論壇同競選添。
聽「前輩」講，當時陳日君就帶頭十分討厭傑哥，認為佢作為天主教徒，卻居然為爭個人名利參加「小圈子選舉」，甚至公開表態贊成23條立法，唔單只違背教區「被動參與」既精神，亦質疑對成個泛民陣營究竟有啲乜嘢好處。聽講話2006年10月，劉慧卿係「政制研討會」上，就直接警告黨友李永達：唔好再講什麼「梁家傑參選特首，係泛民陣營既共識」，事實係我地無共識；同年11月，在職工盟有我地老友過料，話李卓人喺執委會上都同樣強調：「我從來無表過態支持梁家傑參選’」又話「劉慧卿、長毛和大舊都唔妥梁家傑參選」添。
返番嚟黨內，傑哥同Audrey兩個仲要「勾心鬥角」。傑哥心中始終有條刺：點解Martin（李柱銘）成日都睇Audrey唔睇佢，話晒自己落區身水身汗，Audrey佢大小姐乜都唔駛做，民望就成日高過自己，泛民講親「邊個選特首」，舉例都只係余若薇，各位喺外面，我地喺裡面，就算學者做民調，講親都係林鄭月娥，余若薇，曾鈺成，黃仁龍，幾時有聽過攞梁家傑嚟做特首選舉嘅benchmark？建制派議員啲助理話過我地聽，傑哥仲私下對建制派啲議員講，「余若薇？點做得特首！」。
總之一涉及呢啲權力野心，裡裡外外大家都分外有咗戒心 – 我做乜要借個膊頭俾你踩，幫你出頭？就算同特首選舉無關，人家都當成有關，其實傑哥做得飯盒會召集人，你以為好好差事？同之前個馮檢基一樣，其他人唔願孭，你咁恨做，自以為從此就係「武林盟主」，咁咪做到够囉 ！
