「炒何」估計4個DQ議員可留任

才子陶傑在商台的節目《光明頂》星期一晚（8月10日）請了全國政協常委何柱國上去開咪，由於跟住一日人大常委就會宣布立法會的過度安排，才子就叫何柱國估吓人大會唔會俾四個被DQ的議員有無得做。何柱國兜咗一輪先俾答案，認為四個DQ議員應該可以做落去。

人稱「炒何」的何柱國話，佢估中央會放4個議員一馬，邏輯係中央搞《港版國安法》，都係因為香港黑暴難止，被人逼出嚟，可以的話都唔會想搞咁多嘢。由於選舉主任已經話咗4人不合資格參選，阿爺反而要想來想去，都係要諗吓有乜法理根據，可以讓4人留任。

人稱「炒何」的何柱國（中）在陶傑（左）的節目開咪。

「炒何」話，選舉主任話4個議員不合資格參選，係來屆的事。現在4個議員做落去，照計應該解得通，係多一事不如小一事之下，他相信4人應該可以坐多一會。

咁才子又問，阿爺會不會整個好難啃的誓言，實行強人所難，等議員自行DQ自己呢？「炒何」就話呢樣佢就好難估啦，不過做議員要忠於《基本法》，若果有類似要求，又有甚麼問題呢？

「炒何」近年成日報紙寫文，批評特首林鄭，他上得去開咪，才子當然要問吓點解會咁樣？「炒何」就話佢知阿太成日想連任，所以就特別出啲問題等佢答吓，其實係想幫吓佢，仲話如果林鄭答得好「炒何」所有提出的問題，咁就實可以連任喎！

小鯊

** 博客文章文責自負,不代表本公司立場 **

又到周末，傳媒界今日特別多新聞，一單有關傳媒界的消息惹起小鯊注意。話說無綫電視打算推出一套年多前拍攝的劇集《過街英雄》，由森美及黃翠如主演。

有好事之徒，製造假圖話全國政協副主席梁振英發文，要求無綫停播《過街英雄》，否則永久杯葛無綫，梁振英早上已發文澄清，這篇網上流傳的文章不是由他發出的。

梁振英中午已澄清網上流傳的文章不是他發貼文。

但有傳媒仍發出梁振英要求無綫停播的報道，無綫傍晚發聲明反擊有關報聲，全文如下：

「《香港01》有關《過街英雄》的報道全無根據

於今日(8月7日) 較早前在網上流傳一篇疑似梁振英先生的發文，要求「立即停播《過街英雄》……」，內容不盡不實，全無根據。

梁振英先生就此文章已在他的面書作出澄清，說「只是因為有人以「梁振英」名義發出，有人誤以為是我的發文，因此作出澄清」。無綫電視在此感謝梁先生之迅速澄清。

遺憾是有個别傳媒，特別是《香港01》，不但沒有盡一己專業去核實求證 (fact check)，更穿鑿附會。《香港01》早有前科，該報於2018年10月12日在未經求證之下報道「《開心速遞》鐵定明年大結局不添食，無綫38年自製處境劇將成歷史」，居心叵測。

本台保留對該傳媒一切法律追究和採訪配合的權利。」

香港01的報道

睇完無綫的聲明，睇嚟佢對《香港01》真係一啲都唔俾面喎。