壹傳媒(0282)老細肥佬黎同一眾高層，仍被警方扣留未放，但隻壹傳媒炒到不亦樂乎。昨日收0.255元，今日午後最高炒到1.96元，炒到顛晒，之後回番，收1.1元，仍大升331%。
不過若在高位1.96元摸下去，到收市得番1.1元，已唔見咗44%，炒即日鮮高追者亦應該打咗靶走咗。
壹傳媒(0282)炒到不亦樂乎。昨日收0.255元，今日午後最高炒到1.96元，之後回番收1.1元，仍大升331%。
隻股繼續大成交，今日成交股數40.9億股，成交金額42.7億，認真得人驚。壹傳媒已發行股本26.4億股，大股東黎智英揸了71.3%，街貨只有28.7%，即7.6億股，假設大股東無沽貨，街貨理論上一日轉手了5.4轉，假設有部份貨唔郁，轉手量更驚人。
大家都問升乜? 尚風就唔信政治擁躉捧場可以造出咁大成交，繼估咁升法有幾個可能:
1. 炒賣盤。隻股現價市值已急升到29億，已經相當貴。今日最高價時1.96元，等如51.7億市值。壹傳媒咁狀況，點炒賣盤都炒唔上40、50億，所以炒到咁高，呢個可能性反而變得低。
2. 托市輸送資金。升到無厘頭咁高，有政治陰謀論出來，傳聞話用炒高輸送資金俾股東，又話炒高俾錢黑暴。呢啲誇張嘢，尚風亦唔信，因為咁樣俾錢效率太低，會漏咗太多出去俾其他人，無理由炒到咁高，無人蠢到咁俾錢。
3. 炒高呃傻仔。壹傳媒貨源幾歸邊，街貨不多。昨日由0.075元炒到0.1、0.2元，小股東早已走清，咁走一路挾上。昨日收市前一回，今日再挾升。唔信挾到你信為止。
有人問咁都會有人信? 股市呢個幾百年的遊戲，從來都係咁玩，升得少唔信，升多啲就會信。再加少少支持邊個邊的理論，就更多人會信。希望大家唔好做最後一個傻仔啦。要炒，接完貨幾分鐘就要走啦。
尚風
** 博客文章文責自負,不代表本公司立場 **
今早中環IFC話題，當然是壹傳媒高層被捕以及大樓被搜查。不過，金融界人士話，都預咗有呢一日，大家冇乜反應，大家關心嘅係恒生指數可否企於100天線24,200點水平之上，包銷商更關心「螞蟻科技」即將上市嘅安排，為年尾前呢單大刁磨拳擦掌。
警方國安處今早出重手，拘捕壹傳媒創辦人黎智英等7人，涉嫌違反《港區國安法》及串謀欺詐等罪名。被捕者包括黎智英及其兩名兒黎見恩及黎耀恩，以及4名集團高層，包括行政總裁張劍虹、集團營運總裁及財務總裁周達權、壹傳媒動畫總經理吳達光、壹傳媒行政總監黃偉強。而黎智英助手、身處海外的Mark Simon則被通緝。壹傳媒高層，幾乎被警方一網打盡。
警方指今早根據法庭手令進入及搜查將軍澳壹傳媒大樓，出動到幾百個警員到場，都相當大陣仗。
壹傳媒高層被捕，其營運毫無疑問會受影響。但壹傳媒(0282)股價好神奇，今早低見0.075元歷史新低後，在12點後大抽升，下午高見0.4元，一度大升344%。喪升之後回吐，收市時股價從高位回到0.255元，仍升183%，全日成交金額3.9億元，成交股數14.4億。
壹傳媒(0282)股價今早低見0.075元歷史新低後，在12點後大抽升，下午高見0.4元，一度大升344%。
壹傳媒已發行股本26.4億股，大股東黎智英揸了71.3%，街貨只有28.7%，即7.6億股，假設黎智英今日無沽股份出街，今日大半日成交11.04億，即街貨不止轉手一次，有大手炒作。
雖然街外有些KOL話買入壹傳媒股票支持肥佬黎，但以咁大成交咁樣升，不是散戶買少少可以做到，幕後似有搞作，散戶都係不宜沾手，小心有殺人局。
壹傳媒大股東被捕，未來麻煩不斷。而集團的業績亦認真麻麻，6月公布今年3月止財政年度業績，收益錄得11.58億元，其中5.46億元源於數碼業務分部，6.12億元源於印刷業務分部，相比上一年度2018/2019集團收益13.04億元，按年下降11.2%。2017/2018年度收益14.95億元，代表公司受益已連跌三年。
虧損方面，壹傳媒全年虧損由上一年度3.4億元，擴大至4.17億元，數碼業務分部的分部虧損為1.249億元 , 印刷業務分部的分部虧損為2.852億元，每股虧損15.8仙，不派末期息。債務與權益比率大幅上升至96.9%, 上一年度為34%。
集團基本因素乏善足陳，如今咁大升幅，究竟是有春江鴨知道一些外人不知的好消息，抑或有人炒高散貨，再加上咁大成交兼咁大升幅，會吸引監管機構調查，散戶都係好難去玩啦。
