C AllStar十周年慶 辦亞洲首創虛擬互動演唱會

成員Jase稱保證會有真人演出

C AllStar為慶祝組成十周年，將開辦亞洲首創虛擬互動演唱會。

為慶祝 C AllStar 組成十周年，四子陳健安（On仔）、梁釗峰（釗峰）、吳崇銘（King）和何建曦（Jase）將破天荒，在8月28日合體舉行亞洲首個虛擬和實景結合的網上互動《Make it Happen @10 - C AllStar Virtual Live 》演唱會，一向有玩網絡遊戲的四子形容，當知道有機會在虛擬「紅館」做演唱會時，心情比之前他們任何一個演出都更緊張更興奮。最開心的是，網上售票開賣反應熱烈，短短幾日銷量已突破九成。

《Make it Happen @10 - C AllStar Virtual Live 》演唱會海報。

四位成員連日來努力綵排，練歌之餘更需熟習與虛擬實景配合，成員On仔說：「呢個網上互動演唱會，意念好玩又創新，除咗係亞洲首創之外，製作單位仲還原咗紅館嘅四面台舞台設計，我哋又有自己嘅虛擬角色，可以喺台上台下自由活動，鍾意就可以跳落台同觀眾互動，而大家亦可以見到多角度嘅紅館，唔係你坐邊個位，就只係睇到嗰個角度嘅嘢。」

四子近日努力練歌及與虛擬實景配合，東亞唱片高層Gary亦到場探班打氣。

C AllStar 自 2017 年起休團至今已三年，對於這次「十周年限定重組」合體演出 ，四位成員當然滿心期待，釗峰綵排時笑言：「今次唔使騷肌肉，準備好大家嘅電腦就得啦。我哋為咗今次十周年演唱會，會將一啲歌重新編排，係八二八特別版，大家一齊好好慶祝，搵返大家熟悉嘅回憶，同時準備一齊開開心心玩呢隻game。」

C AllStar自2017年已經休團三年。（資料圖片）

DJ King説：「我好鍾意玩呢個game，因為可以自己砌嘢，好似砌 LEGO咁，好開發思維，我最喜歡新實驗、新嘗試，好期待自己可以喺遊戲入面打碟並跟粉絲互動。」

釗峰稱會重新編排某些歌曲，製作成八二八特別版。（資料圖片）

SoulJase補充説：「雖然係破天荒嘅虛擬演唱會全新體驗，但保證會見到我哋真人演出，唔係只有虛擬人物，相信會為網絡玩家帶來一場難忘的演出。」由於當晚演出將結合音樂、電玩、直播及電商元素，為了增加觀眾的真實感，屆時玩家需要憑票及探熱進入會場，門票不劃位，座位「先到先得」。如果觀眾有過激行為將會被「場內保安」請離場館。

製作團隊更精⼼打造虛擬紅館附近的尖沙咀街道，可邊逛邊尋寶。

SoulJase 解釋：「製作團隊耗時3個⽉精⼼打造《超級星光⼤道預熱⼩遊戲》，還原真實嘅尖沙咀街道、鐘樓、天星碼頭、文化中心、太空館、1881 等極具代表性的建築物，屆時會於虛擬世界重現，大家可以喺『尖沙咀』邊逛邊尋寶。已經買飛嘅觀眾可以由即日起進入『尖沙咀』用最短嘅路線搜到最多嘅寶物，換領由各合作夥伴送出的禮品。」

現年40歲的吳崇銘(King)，於2008年參加私人國「星投大戰」歌唱比賽摘下冠軍後，被安排組成男團C AllStar，於翌年出道走紅。四子同心先後四年成為「叱咤我最喜愛組合大獎」得主，奈何組合於2017年休團，King亦因此離開樂壇五年。近日King重新於音樂出發，為簽約Sony後推出的首支個人單曲《掛念你你好嗎》接受雷霆881商業一台星光背後專訪。節目中，他親解當年C AllStar被迫休團的主因，「因為leader走咗，我哋四個好難夾一件事。」另外，King亦首度剖白在疫情期間的經歷，選擇組織家庭成為人夫及人父的經過。

吳崇銘（King）近日重新於音樂出發。

內地大學音樂系畢業的King自認屬「I型人格」不夠aggressive，談及當年歌唱比賽本應歌手合約只給冠軍，最終他卻被安排與陳健安(On)、梁釗峰及何建曦(Jase)組成C AllStar出道，他稱從沒介意，「其實比賽前我簽過公司出過一首《大雨傾城》，有歌有埋MV，心諗仲唔掂？點知上台零反應之後公司仲無埋，係被潑咗一盆冷水，所以做組合互相照應感覺好啲。」C AllStar第二年已橫掃頒獎禮，2014年更首登紅館開騷，King說：「睇返係好順利，當時一路忙唔覺，收入又OK，原來一直無雨無阻係咁幸福。」King坦承組合成軍前與三隊友互不相識，合作磨擦必定有，「我哋處理拗撬算理智，唔會嘈完散。釗峰同On仔有意見會衝出嚟講，我同Jace比較『I』少少，我會問可唔可以試吓咁？會問O唔OK？無話我一定要咁。我講完就算你話唔OK，我就由佢。」

推出首支個人單曲《掛念你你好嗎》。

C AllStar於2017年高峰突休團，King指與四子拗撬無關，「四個一齊都可以做自己嘢，我無問題，只不過因為阿簡（C AllStar經理人簡敬慈）要移民。講真阿簡好勁，我哋大家各有意見，阿簡做到leader令我哋信服有最後決定。因為leader走咗，我哋四個好難夾一件事，再加上之後我哋簽唔同公司，入行幾年亦有各自想法去做，就分開做。」談決定休團，性格被動的King語帶無奈說：「係有啲不負責任，但無計，佢移民都係為咗小朋友讀書。」King休團後轉做電子音樂成為DJ KING，近五年無推出流行曲，問他會不會羨慕隊友On仔或釗峰近日於樂壇的發展，他說：「我真心恭喜佢哋，羨慕係吃不到的葡萄，我真係無咁諗。On仔係超級努力，好有自己想法，每件事都睇得好緊，包括身材、唱歌點唱同MV點拍，每件事都一絲不苟，成功係有原因，好戥佢開心。」

King親揭C AllStar休團內幕。

C AllStar四子於2022年底曾限定重組開騷，King於演出期間突自爆已婚兼已初為人父，他指太太是疫情期間認識，「當時我做DJ成日打碟，係響私人會所識，之後疫情無嘢做，咪造人，哈！當時亦覺得自己年紀有啲大，係時候生小朋友，唔想阿仔同我年紀相差太遠有代溝。」認識太太之前，King指人生經歷了一場反思，「朋友上、工作上嘅嘢都經歷背叛，感情又會話走就走，我發覺任何人都會離開你，嗰期係好震盪，認為只有家人係可以信任，我唔想將我建立嘅所有嘢消失，就將佢畀晒我個仔，就建立自己嘅家庭。」King指兒子Analog現在三歲，快準備入學，亦指自己成為爸爸後改變很大，會爭取更多時間於家中陪伴兒子成長，但他否認為了生孩子而結婚，「阿仔係最重要，但我亦好愛我太太，佢人品散發出嚟嘅感覺好吸引我，呢個女仔係幾好，識到佢係緣份。」

今日（9月13日），下午二時至三時於雷霆881商業一台播放的《星光背後》，主持人 梁泰來邀得吳崇銘（King）任嘉賓。