金多寶說故事

第十回

《話說密法不外傳 世人貪婪迷信邪》上集

「師傅,我果度有鬼呀!」

師傅笑騎騎咁讀啲短訊出黎,成車人好衰咁問:「今次又邊個呀?」中環Y記老闆苦苦哀求師傅,一定要去佢果度睇下,佢兩公婆真係驚到飯都食唔落!Y記坐落中環幾十年,真係幾出名,睇佢每日嘅客量,話佢兩公婆冇錢都冇人信。

「喂!Y記!你鋪頭有鬼定你屋企有鬼呀?」師傅費事嘥時間,直接打去問。

Y記話佢都唔知,但生意都仲係好好。

我金多寶無知衝出黎柒:「五鬼運財咁正?」「有鬼就唔會生意好啦!」師傅話,咁多年除左上去食免費餐,都乜聽過佢話有咩唔妥。說時遲,那時快,師傅撻番着架車,去一個重要嘅地方。

去到九記茶餐廳,大家一坐低就叫野食,頭先幫手做完大壇法事,個個餓到冇命。

師傅打比Y記:「我晏啲過你屋企。」師傅真係型到爆,咁快就肯定係Y記屋企出事;照舊又係佢埋單黎多謝我地班義工,我真心敬佩師傅嘅風範。

第二朝,師傅等齊人車我地番法壇。尋日單野,師傅照舊輕描淡寫:「有人送左對法器比Y記,話招財喎,佢放左响屋企玻璃櫃,咁就出事。」

冇諗過Y記做左咁多年生意,都咁戇尻,令人發達嘅野會送比其他人架咩?「咪就係囉!」玲姐讀書唔多,只係common sense佢強項。

「師傅,係咩法器黎架?」「啊,係好似一對砂槌咁嘅野,類似西藏密宗果啲。」果下我個心一驚,諗起幾年前,無啦啦屋企黎左個密宗師傅,仲好心借左個床位比佢,自此不停撞鬼,貧病交迫,以後嘅金多寶說故事系列會交待。

「邊個咁衰送比Y記?」師傅笑到差啲噴左出黎:「係佢識左卅幾年嘅老朋友。」

係喎,咁果對砂槌點處理?「冇架,送左比人就得架啦。」咁仆街嘅事,真係要好賤格先做得出。「點解唔整爛佢?」師傅話整爛佢冇用,啲鬼都仲會跟住物主。「頂!咁一定有辦法甩左佢架?」唔係冇,要請走,不過密宗啲法比較複雜,有時唔係話普通整幾道符就整得走,最直接嘅方法,真係送走佢地,最好比得番密宗啲壇。

「佢地整啲鬼落啲野度,又運唔到財,把鬼咩?」師傅大叫:「到啦!落車!」咁就唔記得答我。不過每個人做野,總會有原因,離唔開利益。

幫師傅準備法壇,我又遊魂,諗番起呢十年八年,有關密宗法壇嘅怪事。

據我所知,密宗叫得個「密」字,梗係好秘密,唔應該周街都知。

我屋企有人好信密宗嘅師傅,係冇問題架!好似我另一班好朋友,係非常虔誠嘅耶西耶撚,仲好好人、成日幫助別人添!不過,樹大有枯枝,萬物之靈嘅洞察力,有時緊要過你有冇錢。

好似我眼前嘅師傅咁,佢嘅英氣,係相處過就感受到;相反,一啲企到高高在上嘅乜師物師,同你地班「凡人」講多兩句都憤怒又黑面、話「坐得高過佢下世要做爬蟲類動物」喎,會唔會塲戲做得大左?我一直心中存疑。無奈家人深信不疑,我又因家人而接近該密宗師傅,只可以嘆一句,時也運也。

下世會變乜,我金多寶唔識答。肯定做人要光明磊落,即使下半世發生咩事,都心中無懼。

當年家人帶我番大陸一個好隱閉嘅地方,聚集左好多人,然後有一班着住民族服嘅人走左出黎,大聲講「坐得高過呀乜乜乜嘅人,下世要做爬蟲類!」

啲人嚇到坐低,我梗係跟大隊坐下啦,企响度駁搞事咩。

果下覺得幾搞笑,原來講句咁嘅野,會咁多人信!我又學左野。下世變做乜,係因果決定,唔係靠人地把口決定!如果佢講嘅野係真,隔離棟大廈啲人十幾樓果批,連塊階磚都坐得高過佢啦,唔通又變爬蟲類?救命!

唔怪得到左香港今時今日,仲有咁多人中埋啲奇怪騙案。講左咁多,最後咪又叫啲人攞啲錢放入個袋度!呢個情節係抄教會嘅,不過教會就隨心,果度就話「捐得多,福報越大」。又貪福報啦,啲人。

咦?啲錢係捐比邊個架??

我相信密法一定有,只係邊會咁易比我地接觸到吖,比舊錢就有果啲,相信只係密法界嘅A貨。

又唔排除,本身一啲有高法力嘅師傅,受唔住引誘而墮落。好似某一位佛門高僧,曾經以法濟民,德高望重。卻因為風水功力深厚,為富商服務,賺盡名譽地位,仲對戶口一筆巨款,戀戀不捨。

人生最後幾年得果報而病重,該位法師仍堅持入住高級醫院,那知天界看盡一切,派顯神明下凡降之。

法師生怕失去所有,以法力顯派使者保護使其隱藏不被神明察覺,最後兩神斗法,當然法師戰敗,因為法力本身都來自天界神明。

佛法高僧明知一切會發生,早早察覺體內舍利子遞減,卻為名利以卵擊石,愚笨乎?為執着一啲好想要嘅野,真係會令人變笨。唔明嘅,上google,睇下細So婚外情單野了解道理。

呢個故仔,其實預言左所有具貪念嘅人。

-未完待續-




香港兔蘆術數學會

** 博客文章文責自負,不代表本公司立場 **