阿松估計政改有協議

今日有個高檔的亞洲金融論壇，巴士的團隊收到料，前財政司司長梁錦松都有出席呢個活動，仲成為眾人焦點。

有出席者問起阿松係唔係想選特首? 佢來一招太極，話佢老友馬時亨想選就真。再追問阿松你自己選唔選? 佢繼續搵「fit馬」做擋箭牌，笑言馬時亨參選大把握過佢選咁話。

出席者聽到阿松講選特首如此刀槍不入，真係無佢符。不過現場所見，出席論壇的各方猛人雖然多，但係好多人走過來和阿松寒喧，對佢十分熱情，直覺係好多人信阿松係下屆特首參選黑馬。

另外阿松又講起政改和2017普選，雖然而家睇好的人唔多，但阿松係例外，佢估最後阿爺同溫和泛民有機會達成協議，因為溫和泛民如果搞瓜咗，隨時到2047年都無普選。阿爺亦唔想搞喎咗無普選，有意願傾掂佢，所以佢就睇好啦。

巴士的團隊

Ariel

** 博客文章文責自負,不代表本公司立場 **

六叔去矣，107歲，即使活喺長壽村，相信都係笑喪。六叔過世，無記的內部據聞雖大家都有心理準備，早晚有這一天，但當天早上還是有點「甩轆」，新聞稿、後事都即時搞，都有啲滴汗，因為六叔先遊，一點先兆都冇。

據講過身前一日，六叔一切如常，當然不能說生猛，但都同近年的身體狀況無異，到臨天光突然唔得，而且去得好快，可以說一啲痛苦都冇，呢啲真係福氣，一個人臨終前可以去得咁安詳，都係一種笑喪，所以話六叔的喪事算係笑喪中的笑喪。

因為呢個諗法，17日的追思會，唔會係哀傷果隻，會平淡恰靜回憶，朝十晚六，在將軍澳的邵氏影城，開放俾公眾去懷緬一吓呢位影視大亨。由於唔接受花圈，口痕友話如果當日有人想入定花圈或鮮花等，準備喺將軍澳出售賺番筆，可能要蝕本。

六叔過身，普羅大眾對佢長壽秘笈好有興趣，有人就話佢最後日子含人蔘，有接近家人的消息就話唔真確，六叔真係冇含過人蔘之類，仲笑言，講到人蔘咁有效，唔怪得人蔘賣到咁貴。睇嚟六叔的長壽秘笈真係一個迷，或者可以參考吓本網早前的報道：風流六叔高壽 秘練「回春氣功」。