今天想講一個笑話和一個騙局。
個個股民都想找必贏的投資。每次朋友問起有沒有必贏股票可以推介，我都費盡唇舌去講沒有這回事，但他們的神色告訴我:「你屎啫，你唔知咋啩!」
去年底和一班美女師奶在太古城香港東隅酒店Feast餐廳吃飯，她們又問我有乜必贏股推介，我開了一個玩笑，我話「你買得少我有辦法令你必贏，買得多就無辦法啦。」那班美女即時起哄，急問冧把，仲話要攞紙筆。我話我的建議大路到唔大路，你買隻恒生H股基金(2828)，唔好買得多，最多買1萬蚊，同經紀講好買入後10%止蝕，若果唔死就升15%食糊。我一人俾1000元蚊你打底，你10%止蝕最多輸1000元，我俾咗你先，你唔使輸至還番俾我。佢地聽完「唓」一聲，覺得我玩佢地。
我笑笑口話，我呢個笑話有來頭，係來自一個騙局。話說有一個股壇莊家，有一日同三個富貴師奶打麻雀。富貴師奶問佢有乜推介，佢話有隻必贏股，至少升一倍，但隻股貨好疏，唔好買得多，一人唔好買多過一百萬蚊，莊家仲好豪咁話，「輸咗入我數」。
富貴師奶們聞言，大喜過望，第二日馬上落盤，當然唔止買100萬咁少，個個買1000萬、2000萬，等住升一倍發達。隻股開始時真係愈買愈升(佢地幾個爭住買都掃高十格八格啦)，但買到後來多多貨都有，買完隻股已經軟晒。仲唔止，過得一個月，隻股跌咗兩三成。佢地又同莊家開枱，個個哭喪著臉，問「你又話嗰隻股得，我買咗都唔得?」莊家好豪咁攞本支票簿出來話:「我話咗輸咗入我數，嗱當你地買咗100萬啦，我一人賠番30萬俾你。」
三個師奶聽完欲哭無淚，人地又的確話咗叫佢地唔好買多過100萬，買咁多又點怪得人? 誰不知這只是莊家佈的一個局，大力吹那隻股得，騙得師奶們貪念發作，大買特買，等佢地接貨，自己就把手上的貨大手沽給她們，高價出貨。
呢個故仔教訓我地，騙人必須先跌錢，所以散戶見到愈似必贏的投資，愈易中招呀。
陸羽仁已開設Facebook專頁，快啲去Like：
https://www.facebook.com/pages/%E9%99%B8%E7%BE%BD%E4%BB%81/204865603047048?hc_location=timeline
陸羽仁
** 博客文章文責自負,不代表本公司立場 **
我寫投資專欄多年，經常遇到親戚朋友炒股問功課，大家心中只想求一個冧巴，一買就長升不止，看著大家熱切的眼神，期待的面容，我唔好意思講，其實這個世界上沒有必贏的冧巴，幾好的冧巴，都要懂得原理，識得運用，才會發揮得好，所以我比較著重講經濟大勢，基本分析，由於講冧巴太少，搞到差不多俾報章老總炒魷。
我覺得人生就是一個投資，無論買股也好，番工也好，教仔也好，都要先弄懂原理，順勢而行，積蓄財富，最後積少就可以成多，有時欲速就不達。我經常講「七十二律」，如果每年投資都唔輸，每年有10%回報，7.2年就可以番一番，即係1變2，複式投資，再過7.2年2變4。你以為炒炒吓好似好易發，但三更窮五更富，以20年穩陣投資，可能更易跑出。
人生亦一樣，人人都想一朝發達，馬上成名，所以明星這行業最多人想做。我16歲時在旺角行街，有人埋嚟話係星探，話想搵我做明星，我驚受騙，一口拒絕，因為我阿媽經常教我，無咁大隻蛤乸隨街跳，叫我見到乜嘢便宜嘢都要走避。我後來在股市見盡跌錢黨，好多股散戶一買就升，大炒特炒，最後一網成擒。
做事揀一啲少人爭的事情，睇落好蝕底，最後可能易有所成。很多朋友仔女問我搵工的意見，我問佢地想做乜，好多人想發達，想做投資銀行家之類，我話想發達唔係錯，但想做投資銀行家，新人入行，有一半有家底有人介紹，另一半都係牛津，劍橋或常春藤畢業，一來唔易入，二來入到都難爭上位。
投資人生，我總喜歡逆向思維，有機會再和大家分享。
陸羽仁已開設Facebook專頁，快啲去Like：
https://www.facebook.com/pages/%E9%99%B8%E7%BE%BD%E4%BB%81/204865603047048?hc_location=timeline
