老虎仔出41億銀彈志在必得

亞視前主席邱德根之子邱達昌牽頭成立的財團永升（亞洲） 昨日宣佈，競投免費電視牌照，計投資逾41億元開三個台，包括粵語台、英語台及體育台。人稱老虎仔的邱達昌話，永升勝在4位股東的「子彈充實啲」。 呢句話真係突出到佢哋的賣點。

永升4月發出新聞稿所指要投32億元，昨天加碼話首6年預計投資逾41億元，泵多9億打呢場仗。永升4位股東都係有米之人，邱達昌佔股42%， 聯想集團相關的弘毅投資佔28%股權、 富力地產老細李思廉佔16%，何超瓊分佔14%股權，位位都有實力，雖然邱達昌拒絕透露各人的出資比例， 但無人懷疑佢地出唔起呢41億。

反觀另外幾家話搞電視的公司的首6年投資承擔，已取得牌照的電盈搞的香港電視娛樂投資13.8億，有線的奇妙電視投10億，未攞到牌的王維基香港電視投10億，只係永升的四分之一。

搞電視是一個燒錢遊戲，唔可以預一搞就賺。 據業內人士好粗略咁估計，永升搞電視的前期投資要15至20億，餘下21至26億，每年直線攤開可以頂3.5億至4. 3億年虧蝕，預計開台之初無太多收入，到第5、6年收入較多， 所以虧損只是前期較多，即係話預咗前期一年可以輸6、7億， 有番咁上下規模，先有得同無綫鬥吓。

永升CEO何定鈞是以前無綫的阿頭，知晒電視台盤數，佢加入後永升提高投資承諾，應該係何定鈞更加準確地計好數後，叫股東泵多啲水來打這場仗。

高人估計，老虎仔亮出6年投資41億這招撒手鐧，睇嚟佢地投牌志在必得，即使冒出其他人來投牌，都無辦法有咁多錢跟，永升又肯出錢，又有具經驗的電視人士經營，取牌的機會大大增加。

Ariel

** 博客文章文責自負,不代表本公司立場 **

昨日有法律界人士笑稱，Arthur luk(資深大狀陸貽信)打贏真正的無頭公案。古代話難打的官司叫無頭公案，死者被人斬咗個頭，可能唔知點死，無證無據，呢啲官司唔知點打。而家呢單秦嘉儀案，唔止無頭， 無屍，仲一滴血都搵唔到，理論上無直接證據證明秦嘉儀死咗， 要代表控方起訴，案件難打程度可想而知。

   

呢單官司控辯雙方大狀都係出身於DOJ(律政司)， 代表控方的外聘資深大狀係陸貽信，佢係前侓政司副刑事檢控專員，做到60退休，出來私人執業，接咗單案幫控方打。 而辯方資深大狀Marash係澳洲人，早年來港加入回歸前的律政署，後來一早出來私人執業。

由於單案全無直接證據，全部靠合理推論，事前外界都覺得辯方有得打，控方好難打。點知控方最後全勝， 陪審員一致裁定有罪，兼且火速用咗兩個幾鐘就傾完， 顯示他們意見相當一致。控方大勝一仗。  

陸貽信打官司的特色係穩紥穩打，為人謙虛，一步一步爭勝， 打呢個官司亦係同一風格。佢份人有正義感，睇個樣都睇到。而律政司打謀殺案都喜歡搵同一個部門出身的大狀去打， 因為謀殺案難打，佢地經驗較佳，取勝機會較大。

不說不知，原來陸貽信不是紅褲仔讀law身， 佢畢業後入了司法機構做傳譯員，入咗法律呢行， 後來再去讀law，讀完才入律政署，一做就30多年。 離職後私人執業，專打刑事，如今和資深大狀清洪同一個大狀辦事處。