孕婦賭博
作者：蕭生
經常有人會講，唔好同大肚婆打牌，次次都輸畀佢，又有人會講，去賭場，千祈唔好同大肚婆荷官玩，輸硬。點解大肚婆賭運特別好？又係唔係真嘅呢？
首先我想講吓2個我喺網上搵到嘅說法，點解孕婦賭運特別好。
1) 孕婦又稱做運婦，意思就是好運的婦人，女人懷孕本來就是上天賜予的大氣運，是大自然的規律來的。講究的都是一個順字，所以也就有了很多人相信孕婦有大氣運的說法。
2) 孕婦係兩為一體，你打牌係一個人一對手一對眼，而孕婦係兩人四手四眼，點會輸畀你。 雖然我哋無辦法證明以上說法係真定假，亦都係遠古流傳落嚟，已經無可能搵到出處，但無所謂，贏錢就是硬道理，只要贏到錢，講咩理由都啱。(笑)
作為男仕，我當然無可能懷孕，但老婆懷孕，又會唔會帶挈到老公贏錢呢？我會答你，贏嗰時咪會囉，輸嗰時咪唔會囉。(廢話)
以下係筆者嘅親身經歷，話說早年有一次買馬，當時一個星期內馬會有本地馬同海外馬，當時手痕嘗試買孖T。
我從來未玩過孖T,因為覺得邊有咁好彩中呀，但真係畀我中咗，不過注碼唔大，而且都算熱門，回報唔高，但因為中過，幾日後跑本地馬就再買一次，又中。
一星期內中咗2次孖T,加埋其他投注，計計埋埋嗰個星期都贏咗近萬銀，非常愉快，就喺同一時間發現原來太太懷孕，真係開心到不得了，當時就諗原來老婆懷孕都會帶挈老公贏錢。
前陣子老婆又再次懷孕，由懷孕至今，我都未贏過大錢，埋單計數，今次懷孕期我仲要輸多贏少，輸到頭到暈埋。
所以各位準爸媽，未來準爸媽，懷孕期小賭無妨，贏就歸功於肚中寶貝，輸嘅時候就當娛樂支出， 切勿認真以至影響孕婦及胎兒。祝大家賭運亨通
香港兔蘆術數學會
** 博客文章文責自負,不代表本公司立場 **
