政改三人組其中兩人譚志源同袁國強，加埋行政會議成員陳智思，昨日到中環推銷政改諮詢派傳單。現場所見律政司司長袁國強派單張時靦靦腆腆，唔識同市民吹水。
佢地在午飯時間派嘢，地點在中環皇后像廣場旁的地鐵口附近。「荀盤強」係資深大狀，律政精英，當然做唔慣呢啲政治工作，只係派單張，唔敢開口撩市民講政改。但佢認為市民唔講嘢唔係政治冷感，可能只係中午趕時間啫。
未婚的袁國強被稱為「荀盤強」，據聞個人能力極高，在行會中講說話極有紋路，甚至有人形容佢係行會中最有料的成員。咁好料當然最啱選特首，但2017年似乎略嫌太早，但未來政治前途未可限量，不過先要學識做政治工作。
講到派單張、主動接觸市民這些事情，的確又唔係傳統精英，特別係袁國強這種人中龍鳳，一時之間可以適應的。
這令人想起一單往事。時為1991年，當時仲叫做御用大狀的李柱銘參加香港首次立法會直選，李馬丁跟住「港同盟」成員到酒樓派宣傳單張，記者見佢嘅表現同今日嘅袁國強一模一樣，又係咁怕醜。市民唔知佢係乜水，對佢愛理不理。李大狀亦唔識得同市民吹水，就好似儍仔咁硬隊單張。不過，其後李大狀經過幾屆選舉，再睇佢落區已經變得如魚得水，談笑風生，與市民打成一片。
所以，凡事都有一個過程，以袁司長這樣的高能人士，相信只要落多幾次區，就唔會再做「怕醜仔」啦。
Ariel
** 博客文章文責自負,不代表本公司立場 **
近年，香港人對「自由行」這三個字或許有點不是味兒，滿街滿巷都擠着買名牌買奶粉買日用品的內地客，儘管有戚戚然的感覺，但又不能抺煞他們的超級購買力，對帶動香港經濟實在起了一定的作用。
有友人就目睹一奇景，自由行旅客狂晒幾十萬戰利品，事發喺某六星級酒店大堂，多名操廣東話男女，將大堆疑似名牌公然堆放清點，令平民百姓側目，心懷不軌者心想，咁玩法唔通係央視玩路人測試？
一輪喧鬧，點算完成。
睇住呢批自由行客人開心，名牌店和酒店的老闆可能更開心，因為能箍住這班客人的心，業績肯定有保障。要知道歐債危機雖然禍延全球經濟，但對中國似乎影響有限，中國奢侈品消費更逆勢高漲，據知今年漲幅預計會達25%至30%，市場規模隨時過千億，如無意外會超越日本，成為全球第一。這群血拼兵團，不單在香港拼，其拼購版圖亦已擴展至歐美，連向來周六周日不辦公的意大利和法蘭西人都因為兵團的豪花而不得不抵頭，乖乖開門迎客。錢，果真魅力沒法擋！
巴士的團隊
