張宇人拉泛民搶內會主席

自由黨的壞孩子形象都好突出， 最新一章係自由黨張宇人話明有意做立法會內務委員會主席， 要拉現時做緊內會主席的經民聯梁君彥下馬， 而泛民議員亦有機會支持張宇人去角逐。

據張宇人自己的講法，佢話下屆2016年佢都未必再選， 又做過財委會主席，想做吓內會主席，目的係學吓嘢， 做吓唔同工作。

張宇人年紀不輕都仲咁有學習精神，真係令人敬佩， 可以頒個終身學習獎俾佢。不過呢個「學嘢」行為， 客觀上就係自由黨單挑經民聯，建制派自己打自己的味道幾濃吓。( 又一次證明自由黨都唔係咁建制派啦)

過去呢啲委員會主席的位置，是建制自己講掂數分好豬肉， 再同泛民去講數，講唔掂就舉手，好少見建制派自己打自己。 建制派大黨對自由黨呢個行為唔太支持，民建聯葉國謙已開口， 話內會主席一做就做五年，好少中途換人。 工聯會王國興對張宇人的行感到好意外，亦話明唔支持。

立法會知情人士話，自由黨得5票，加埋老死林大輝有6票， 但要取得35票先可以選上內會主席，遠未夠票，自然要和泛民26 名議員傾下偈，若攞埋泛民票，有32票在手， 拉吓獨立議員梁家騮、謝偉俊等人的票，都有相當威脅性。 而泛民飯盒會召集人何秀蘭回應記者時， 講到張宇人做內會主席都有得諗咁款，相信雙方已有初步溝通。

知情人士話，呢單嘢最後要西環發功，拉住中間票不要流失， 警覺性高應該無事，張宇人唔易成功，但當中都有一番惡鬥。

Ariel

** 博客文章文責自負,不代表本公司立場 **

近日同有位政壇高人食飯，佢講起最近見到建制派人士對時局政事評論，搞到相當混亂。

一位係全國政協外事委員會副主任盧文端，講到泛民可以有「忠誠的反對派」，意思係只要你唔反中央，就可以做「忠誠的反對派」啦。高人話搞唔清楚乜嘢叫忠誠的反對派，一係就係建制派，一係就係反對派，或者可以有溫和的反對派，但就唔覺得有「忠誠的反對派」囉，反對派自己都唔會認佢哋自己對中央忠誠啩？！

又好似自由黨田少咁，個個都叫佢建制派，如果用盧文端的標準，可能叫佢「忠誠的反對派」仲似啲喎，因為田少講好多嘢都係針對特區政府，一啲都唔似建制派，唯一係冇大力「媽」中央啫。

總而言之，「忠誠反對派」的講法，相當奇怪。

另外，全國港澳研究會副會長劉兆佳之前講話特區十幾年無培訓政治人才，高人亦覺得有啲奇怪。劉教授講得比較負面，其實建制派有建制的人，泛民有泛民的人，目前的政治局面咁樣，根本愈來愈對立，不關乎有無人才。

高人覺得，自佔中和政改方案不獲通過後，建制派總結分析全局形勢時，唔見得佢哋做得好好，只係因應形勢做了一些比較浮面的分析，而這些分析各人講出來的版本又不同，所以給人感覺思維大混亂。