生活事
出軌唔係男人專利，絲打們一樣會偷食。新加坡家事及少年司法中心做過一項調查，發現喺老公們平均40歲，老婆37歲的情況下，夫妻關係最易出問題，離婚率亦相當高。照道理呢個年紀，兩個人拍拖、生活十幾年，磨合期早就過了，點解仍逃唔過婚姻危機？
網上圖片
有專家話結婚頭3年係磨合期，第7年係危險期，正所謂「七年之癢」嘛！到了10年後就進入倦怠期，大家都覺得對方好似自己左右手，以為親情取代咗愛情，以前唔成問題的小事都會攞出嚟吵鬧一番。
有調查顯示，夫妻雙方因瑣事溝通不暢，最終導致離婚的佔率高達離婚個案總數兩成。多年婚姻積累下的柴米油鹽問題，成了最傷人的利器。
網上圖片
再加上結婚十年，夫妻無論在外表抑或做人處世上，都與結婚時差別很大，兩人個性、人生觀、金錢觀、教養孩子態度、處理壓力方式等各方面的差異，均會毫無保留地暴露出來，當中任何一個問題都足以令婚姻破裂。
結婚愈耐，彼此愈習慣，就愈容易忽視相互理解的重要，最終就令感情漸漸冷淡。所以不論有咩問題，夫妻雙方都要坦誠溝通，迴避永遠都唔係解決問題的方法。
芝芝‧知性
** 博客文章文責自負,不代表本公司立場 **
芝芝成日聽到姊妹訴苦，懷疑男友或者老公出去偷食，呢日又有一單。婷婷跟阿Man拍拖幾年，兩小口子早排鬧交冷戰，婷婷搵姊妹Doris呻，Doris見姊妹一場，就喺婷婷同阿Man之間做信差，點止傾傾吓無曬Doris聲氣，婷婷走去搵其他姊妹八嚇，先知原來阿Man居然同咗Doris拍拖喎！兩姊妹梗反面啦！查實，姊妹們身邊嘅閨蜜，係咪真係特別容易同我哋男友搭上呢？
網上圖片
叫得做「閨蜜」，自然係嗰個同你性格好似，同你最親密嘅姊妹啦！好似成個世界都唔要你，呢位「閨蜜」都會攬實你，佢甚至了解你多過你自己。
至於「男朋友」呢？理論上都係同你喺性格上好夾或者能夠互補嘅男人，由決定呢段關係開始，你似乎已經認定佢係你嘅白馬王子。照咁講，閨蜜同男友係性格上應該好相近，結果就發生可怕嘅事了！
芝芝上網見到一項調查，發現原來63%男人曾對女友嘅閨蜜心動過，當中唔少人仲話能喺女友閨蜜中，持續搵到讓自己心動嘅女仔添！
調查仲話三成半男人在女友閨蜜中發現心儀對象對，會付諸行動，採取各種挑逗行動——23%玩曖昧，12%玩表白。最得人驚嘅係，居然高達10%男人會表白成功！真係心動不如行動囉！
網上圖片
喺人際交往嘅過程中，如果我哋受到某種誘因刺激，而呢種刺激又係投其所好，就會引起對方注意和交往興趣，相互吸引。試諗吓，如果你閨蜜失戀時，你個男友仔「唔覺意」安慰一下，講幾句中正佢內心嘅話，喺你不在場嘅情況下，孤男寡女難免會有啲嘢囉！
大家都知就生得靚嘅姊妹，搵工易過生得普通嘅姊妹。同一道理都應用到喺男女關係上。好多姊妹鐘意拖住男友參與gathering，點知又係另一高危點。男人唔係用來炫耀，閨蜜見到你男友係「荀盤」，真係會咁乖乖地坐喺度同你傾偈咩？
你真係有把握帶得男友出去，然後將他完完整整帶返屋企？如果無就咪帶出去了，閨蜜雖然好，但愛情本質係自私，就算閨蜜都要提防！
所以呢，要男朋友同閨蜜保持遠遠嘅距離永遠是上策！睇完芝芝，你千祈咪走去問你男友，有無對你嘅嘅閨蜜心動過，因為世界上仲有好男人，相信你身邊那位就係囉！
