美國70年代可卡因廣告

吸毒害己害人，美國有位媽咪因為咁樣痛失丈夫，同對仔女企喺屍體隔離笑笑口影咗張陰森照片，膠仔睇到個心離一離。今時今日嘅美國，無論吸毒、販毒以至為毒品賣廣告都屬犯法，但係你哋又知唔知其實多個州份曾有段時間係允許傳媒宣傳毒品？

美國早喺1914年已列可卡因為禁藥，除特定醫學同治療同途外，一律禁止民眾使用。俄亥俄州同埋內布拉斯加州有明文規定相關產品影像不得見於宣傳物品，不過其他州份要到1981年先禁絕毒品廣告。我認為呢個決定實在太遲，禁得隻藥又唔禁止佢宣傳，有無咁戇居？

無論如何，南美國家哥倫比亞一直以嚟都有毒販走私可卡因到美國，有唔少人會喺藥物或醫學雜誌高調賣廣告，宣傳吸食可卡因究竟有幾High，講到可卡因有幾好幾好，70年代尾最多。據說有唔少人俾呢類廣告洗腦，一試上癮，永不翻身。美國一個創意網站近日搜羅咗呢批圖片，膠仔同大家分享一下。

睇還睇，呢啲純粹分享吓，唔好睇完走去吸毒咁戇居呀。

仲有其他圖片，想睇就去呢度：
http://imgur.com/a/Ipsek

神州快訊

** 博客文章文責自負,不代表本公司立場 **

北韓喺膠仔眼中係個好神秘嘅國家，就算去過當地旅行，都係無法理解到當地文化。美國NK News特設一個Ask a North Korean節目，專請脫北者講講當地生活。最近我睇到佢講當地人如何結婚，同大家分享吓。

有脫北者話，原來北韓嘅婚禮並非乜嘢私人場合，現場通常會有政府人員或者勞動黨黨員，唔知係唔係因為怕人多聚埋一齊會搞事。新人手上花球唔能夠掟俾來賓，要留返嚟等婚禮結束時向最高領導人嘅塑像獻花。另外，婚禮不能夠喺領袖生日當日舉行，結婚相亦要喺領導人雕像前影。總之所有儀式都要顯示新人心中常存偉大領袖。

大部份新人會着上傳統韓服接受親友祝福。親友要帶禮物赴宴，無錢的話會問人借食物或者乾糧，較有錢嘅就會送禮金，黨員同埋幹部為咗突顯自己身份同地位，仲會現兜兜俾美金。北韓人結婚又有個奇怪傳統，婚禮現場一定要一對活雞，一公一乸，嘴入邊分別塞滿棗同埋紅辣椒。

對於有權力嘅人而言，結婚更加係個彰顯身份同地位嘅重要場合，婚禮會場內一定要有好多好多人，會場外一定要有好多好多車。若然國家高層人士肯送出一隻手錶俾新郎，顯示新郎哥絕對唔嘢少。

外國人結完婚會去度蜜月，但是北韓民眾對此完全無概念，最好今日結婚聽日返工。為國家賣命效力最重要。