政府早前完成本港接待旅客能力的評估，估計到2017年訪港旅客將增加至超過七千萬，認為大致能夠承受到，到2023年估計會突破一億添，聽到呢個數都幾嚇人。點知商務及經濟發展局的蘇局長，唔似有備而戰咁，冇咩特別的應對方案之餘，仲講咁句，市民要等多班車，有啲不便啦。
今日蘇局長再上立法會解畫，講來講去又係增加景點分流旅客，冇好實質的全盤計劃應對，要知道今時今日做得問責官員，推行一項政策或者公布調查數字，都要有啲政治敏感度，現時反內地遊客的情緒雖然比之前冇咁高，但始終係一個好易被挑起的議題。
聞說政府高層對蘇局長的做法亦有啲摸不着頭腦，你話以佢的背景同過往表現，又唔似係有心玩嘢，但明明有炸彈，又好似唔察覺咁就拋出來，高層提起呢位蘇局長，都齊齊：唉…！一聲。
或者蘇局長，應該放低身段，感受一下平民化生活，依家市民搭車、行商場超市，旅客人頭湧湧，好話唔好聽，用晒牙膏，落街去超市買都逼滿掃貨的內地旅客，排長龍為買支牙膏，都幾影響日常生活。
明知評估出來旅客數字增長到1億咁驚人，係唔係要公布係一個問題。若然要公布，蘇局長應該研究吓有咩紓緩措施，一齊公布埋，唔係一句話同內地保持溝通，確保港人生活，不會因為旅客增加受太大影響。市民完全感受唔到政府做咗嘢，或者做緊咩嘢應對旅客增加帶來的影響。
Ariel
** 博客文章文責自負,不代表本公司立場 **
新興巿場匯價有暗湧，阿根庭披索匯率下插，引發美股道指週五收市時下挫318點，周日遇到前財爺阿松（梁錦松），問佢驚唔驚爆全球股災，佢笑笑口冇詳細評論，但見佢神態輕鬆，似乎覺得冇乜咁大件事。
佢仲透露早前在財金猛人聚集的亞洲經濟峰會做主持人，對話的包括騰訊主席馬化騰，全國政協副主席、前特首董建華等。
聽佢講反應幾熱烈，似乎阿松都有號召力，但阿松就冇透露除咗論壇上交流，有無同董伯伯私下對話。
自從被本網爆阿松同曾主席孖咇出席政壇飯局後，阿松成為特首跑馬仔的黑馬，出席活動都頗受關注，佢亦都表現幾軽鬆，對住傳媒亦會講吓對時局的看法，莫非真的熱身乎？
