呢單嘢實在Old News到不行，話即用即棄竹筷子頂部圈圈愈多，回收次數愈多。呢類有話題無事實嘅偽新聞，總係久不久就會喺網上翻炒。為免再有人「中伏」，膠仔決定寫返篇文。
台灣《三立新聞》2013年報道，有醫生向記者轉述一個喺回收工廠嘅病人表示，竹筷子頂部圈數代表咗回收次數，圈數愈多，表示愈多人用過，所含漂白劑亦都愈多。記者仲煞有介事咁做咗個實驗，將蝦仔同有三個圈嘅竹筷子放入同一杯水中，一晚後啲蝦有過半數瓜咗。
其後《東森新聞》引述業界人士否認指控，強調圈圈刻痕純粹係裝飾。首先回收筷子清新再漂白，整個過程涉及太多人力物力，價格比製造新筷子仲要貴，無人咁戇居嘥錢做呢啲嘢。當年有網民提出最環保同埋安心嘅方式其實係自備筷子；如果萬不得已要用即棄筷子為求安心，用完拗斷佢囉。
我同樣覺得，食客用完即棄筷子之後都會掉入垃圾筒，照常理筷子下個目的地就係堆填區，邊可能有人咁神心逐袋垃圾搵返筷子出嚟？另外要注意嘅係，《三立新聞》用嚟做嘅實驗係一杯「死水」，一堆蝦仔整晚只能依靠杯中氧氣為生。一晚過後氧氣用得七七八八，有無放筷子都好，啲蝦都會死傷大半。
其實同樣流到爆嘅網上傳言仲有好多好多，膠仔覺得我哋無可能阻止其他人轉發，畢竟呢種都係言論自由。重點在於我哋收到呢類消息之後，一定一定要核證，用用腦袋諗吓真定假，唔好人講乜你信乜先得。
神州快訊
** 博客文章文責自負,不代表本公司立場 **
敍利亞內戰導致數以十萬計難民逃到世界各地，歐洲各國對此尤為頭痛。呢場戰爭除咗難民問題之外，其實仲有好多嘢值得關注，例如係逼使人類首次計劃動用「末日種子」，以解決中東地區糧食問題。
多國科研團隊早於2008年，已經喺挪威同埋北極之間嘅斯瓦爾巴群島一座冰山上建造「末日種子庫」，保存糧食、藥物同埋珍稀種子，確保人類經歷重大事件如瘟疫或戰爭後仍然有足夠糧食。東亞地區經歷咗沙士，美國發動伊拉克戰爭，非洲爆發伊波拉病毒等等重要國際事件，科學家都仲忍得住手唔去郁呢個倉庫。嚟到呢場敍利亞內戰，人類終於首次動用一批「末日種子」。
中東研究員過去主要由敘利亞北部城市阿勒頗提取農作物種子，但係因為當地戰火連天，科學家想進入呢個兵荒馬亂嘅地帶非常困難。為咗中東其他地方可以繼續耕作，維持糧食供應，佢哋早前提出由種子庫中取出批抗旱作物種子，包括小麥同大麥等在內一共130箱、116,000份樣本，佔「末日種子」總數近13.5%。
幾年前知道人類開始建立末日種子庫嘅時候，膠仔真係得啖笑，以為末日喺有生之年都無可能出現；呢則消息完全扭轉我諗法。早兩年聯合國報告仲話世界糧食產量仲係增加緊，問題只在於分配不均；而家就同我講呢人類已經要出動最後儲備，聽人駭聞。
膠仔望住面前一碗飯，忽然覺得自己真係好幸福。我唔使逃避戰火，加上有手有腳，俾心機捱老襯就會有餐飽飯食。我能力有限，敍利亞咁遠幫唔到啲咩，但係要幫嘅又點止遠在他方嘅難民？猶幸香港人仲係好有愛心，例如山東街「睡婆婆」咁，唔少人知道佢遭遇後都會關注事件，總算令我有點點釋懷。
香港加油。
報道原文：
http://uk.reuters.com/article/2015/09/21/us-mideast-crisis-seeds-idUKKCN0RL1KA20150921
