膠仔準備去日本旅行，由於我未見過世面，出發前梗要做足功課，上網搵搵當地有咩禁忌，發現其中一項竟然係唔好讓座俾老人。日本人咁好禮貌，竟然唔識尊重老人家？
非也，其實佢哋咁做反而係一種禮貌表現，為想獻座嘅對象設身處地而想。原來日本人認為，當面同對方講：「我俾個位你坐。」無異於同對方講：「你老啦。」或者係：「你要人幫。」咁樣非常之無禮貌，令對方好尷尬。
由於日本人唔鍾意俾人同情，甚至調返轉頭覺得要人讓座等於對其他造成不便，所以去日本都係唔好太主動請人坐低好。若然真係想俾座，應該換個間接啲嘅方式，扮晒蟹要落車，行去車門隔離企定定，甚至移步到另一節車廂。啲人有需要的話自然會坐。
近年香港都有好多人爭論讓座文化，我又講講自己經歷。以前膠仔兼職做待應，嗰日撞啱情人節兼大年初一，忙到發瘟，放工坐地鐵半睡半醒。忽然有個阿姐問我何解唔讓位俾面前位伯伯，後生仔好氣好力之類。我因為唔為意前邊有位伯伯，突然變做廢青，唯有起身俾個位人座。阿姐個樣仲好似教我上咗人生寶貴一堂咁，唔該晒。
「己所不欲勿施於人」，相信無人想有日攰到癲嘅時候遇到同樣經歷；「己欲達而達人」，相信唔少人都想喺自己有能力時為別人設想一下。關於讓座，我想說的是，請勿因為一個位去批判他人；我哋要做嘅係多為別人設想，久而久之會成為一種文化，公德就係咁樣培養出嚟。
最後俾埋篇文你睇：http://jpninfo.com/tw/105
神州快訊
** 博客文章文責自負,不代表本公司立場 **
性事安全要有一「套」。市面上有好多唔同嘅安全套款式，除咗避孕、防止性病流播之外，有啲仲話可以增加情趣。膠仔今日同大家講下呢個小小膠袋仔如何演變成今時今日五花八門嘅模樣。
據說類似避孕套嘅用品早於公元前3,000年已經喺克里特島出現。有個國王衰鹹濕受到老婆詛咒，從此精子進入任何女子體內，都會致對方於死地，嚇到國王唔敢再近女色。後來國王發現先喺女方陰道放入山羊腸再行房就無事。講得白啲，個國王玩女人玩出性病，所以會傳染其他女人，最後學識用套就無事。
第二個講法係埃及法老王用駱駝皮製作出一種套，每次同出身低賤嘅女性行房時就會用，確保佢哋唔會生出血族比較cheap嘅後代。考古學家耐唔耐就會喺古代壁畫中見到古埃及人使用避孕用具。除咗用嚟避孕外，佢哋仲會用嚟裝飾男性屍體嘅生殖器。另外又有考古學家喺法國南部一個洞穴中，發現公元一世紀時已經有人刻畫用安全套嘅情況。
人類喺膠套發明之前，多數都用動物器官當做套。現存最古老嘅安全套大約喺公元17世紀出現，以魚鰾和動物嘅腸藏製成，大家想睇可以去大英博物館。據講呢個dom好難「應急」，因為使用前要經一夜浸泡，變軟先用得，如果唔係男士嘅細佬就慘囉。
直到工業革命之後，先有人諗到可以用橡膠嚟製作安全套，成品較以更加方便、易用，但係仍然需要大量人手去整到個dom變得平滑，始終未能普及。到1920年，工業發展因為第一次大戰進一步得到發展，有人發現乳膠較橡膠質地更加柔軟。過去幾十年，各大生產商同埋科研中心繼續沿用乳膠安全套設計，致力令套套變得更薄更貼身，再加上殺精劑、顏色、香味、情趣圈等，就成為今時今日大家見到嘅產品啦。
