日本騎呢上位賺錢大法

唔知幾時開始網上直播私生活成為潮流，有人索性連工都唔返，淨係日日對住鏡頭食飯，每月收入達到廿幾萬港元。膠仔上網查咗幾查，發現大部份騎呢副業都係由日本人發明；除咗直播之外，仲有好多方法可以名成利就，簡單講兩句。

【偶像踢】24歲靚女野形仁美係一名專業拳手、副業係模特兒。唔好睇佢瘦孟孟咁呀，踢起人嚟都好大力。佢某日忽發奇想再開創另一份兼職，專門踢人pat pat，喺街頭免費「醒」男士兩腳，呢項騎呢服務竟然大獲好評，有關片段更令佢成為網上紅人。曾有電視台訪問佢，主持都會請佢踢返兩腳。最近東京一間創投公司更決定出錢支持佢繼續踢人，藉此鼓勵當地女性成為YouTuber。

https://youtu.be/aWh8-sGAISM

【出租Uncle】伊東孝西本現年47歲，喺當地時裝界有一定地位。佢工餘時間會以每小時八美元價格「出租」自己，陪客人食飯、Shopping。佢至今已經接待過超過1,500名客戶，大部份係女士或者年輕人。班客仔搵佢出嚟絕非解決生理需要，而係因為一顆寂寞的心，生活、家庭、朋友或者事業遇到阻滯，苦無傾訴對象，想搵人傾計。伊東孝會同客人分享自己經驗，又或者係提供可行建議。唔少人都話佢俾到意見中肯實用，傾完計後心情靚晒。就係因為咁，呢門生意愈傳愈開，搞到佢分身不暇，要聘請其他「生活導師」幫忙。

【罵人】28歲演員吉木理沙出道之初以火辣寫真上位，尺度堪比AV，膠仔咁冷靜都睇到血脈沸騰；去年主持東京電視台節目《我想俾理沙罵》後知名度更高。佢喺節目要做嘅嘢就係對住鏡頭瘋狂大罵，以激烈措辭盡道社會上種種不良現象。佢衣着打扮相當斯文，同節目中暴躁表現形成強烈對比，但係觀眾竟然好受落。有訪問話日本人過咗30歲後，身邊愈嚟愈少人願意提點自己錯處，所以呢類節目可以迎合好多人需要。結果係點？吉木聲名大噪，廣告代言接唔停囉。

最後都係補上原文：
http://asia.nikkei.com/Life-Arts/Life/The-odd-allure-of-being-kicked-and-berated

神州快訊

** 博客文章文責自負,不代表本公司立場 **

坊間流傳好多減肥偏方，萬變不離其宗都係控制飲食，多做運動。膠仔身邊朋友普遍覺得為免暴飲暴食，減肥時應該食得清淡啲，食物太好味容易食得多嘛；只不過實情係有多項研究表明，減肥時更應該食啲好味嘢。

丹麥哥本哈根大學研究員喺2013年進行過研究，俾兩組測驗者試飲兩款卡路量相約嘅湯，一款味道淡如水，另一款較濃。結果飲味道較濃嗰一組人較容易滿足，一碗起兩碗止；飲較淡嗰組人會飲多近兩成落肚，而且更容易覺得肚餓。荷蘭馬斯特里赫特大學2009年亦發表過類似研究，話人類食到自己鍾意嘅美食後，食慾會迅速下降；食到普通以至係劣質食物時，反而容易出現暴飲暴食嘅情況。

以上提到兩項結果都證明減肥並不等於放棄美食，重點係嗰份美味由咩成份組成，含幾多能量啫。美國康奈爾大學教授Brian Wansink喺網上發表過一篇文章，話飽肚感同環境因素都有關，例如盛器愈大個，愈容易令人攝取更多卡路里。內文又提到，平日應該進食多啲營養豐富且味道好嘅食物，例如係新鮮蔬菜同水果等，心理因素會促使大家減少食零食，減得健康又有營。

《French Women Don't Get Fat》一書中介紹法國人點樣保持靚靚身材，推介貪靚之人睇睇。我睇完後覺得法國女性俾外界感覺食極唔肥，秘訣唔係因為佢哋體質特殊，而係因為飲食好講究，樣樣細細份，味道豐富，容易產生飽肚感，實際食落肚嘅份量並無想像中多。