咪待薄自己 減肥更應食得好

坊間流傳好多減肥偏方，萬變不離其宗都係控制飲食，多做運動。膠仔身邊朋友普遍覺得為免暴飲暴食，減肥時應該食得清淡啲，食物太好味容易食得多嘛；只不過實情係有多項研究表明，減肥時更應該食啲好味嘢。

丹麥哥本哈根大學研究員喺2013年進行過研究，俾兩組測驗者試飲兩款卡路量相約嘅湯，一款味道淡如水，另一款較濃。結果飲味道較濃嗰一組人較容易滿足，一碗起兩碗止；飲較淡嗰組人會飲多近兩成落肚，而且更容易覺得肚餓。荷蘭馬斯特里赫特大學2009年亦發表過類似研究，話人類食到自己鍾意嘅美食後，食慾會迅速下降；食到普通以至係劣質食物時，反而容易出現暴飲暴食嘅情況。

以上提到兩項結果都證明減肥並不等於放棄美食，重點係嗰份美味由咩成份組成，含幾多能量啫。美國康奈爾大學教授Brian Wansink喺網上發表過一篇文章，話飽肚感同環境因素都有關，例如盛器愈大個，愈容易令人攝取更多卡路里。內文又提到，平日應該進食多啲營養豐富且味道好嘅食物，例如係新鮮蔬菜同水果等，心理因素會促使大家減少食零食，減得健康又有營。

《French Women Don't Get Fat》一書中介紹法國人點樣保持靚靚身材，推介貪靚之人睇睇。我睇完後覺得法國女性俾外界感覺食極唔肥，秘訣唔係因為佢哋體質特殊，而係因為飲食好講究，樣樣細細份，味道豐富，容易產生飽肚感，實際食落肚嘅份量並無想像中多。

神州快訊

** 博客文章文責自負,不代表本公司立場 **

膠仔早兩日睇到單新聞，話「脫北」移居到美國嘅堅強女子朴延美出咗本書，描述一家人由北韓走佬到中國，特別多謝媽咪犧牲肉體代替自己俾蛇頭強姦。我睇到心噏噏、眼濕濕，一方面受母愛感動，另一方面為北韓民眾遭遇感到悲哀。

單新聞喺呢度：
http://www.bastillepost.com/hongkong/6/849569

我另外搵到段片，有人勁好心機搵返朴延美一年前喺青年領袖峰會嘅演講片段，配埋字幕，得簡化字版本，睇住先。除咗之前新聞報道嘅走難過程之外，朴延美喺演講中喊晒口咁憶述北韓生活實況。

佢話九歲時親眼睇住朋友嘅媽咪因為睇荷里活電影俾人公開處決。另外無人可以質疑金氏家族嘅統治，如果唔係有機會累及三代等等。極權統治之下，四圍都係政府耳目：「連雀仔同貓貓都會聽到你講乜。」

另外要注意嘅係，朴延美講到現時中國有近30萬名「脫北者」，其中七成都係年輕女性，遭遇非常可憐。換句話說，就算成功走出北韓，其實都唔等於離開咗地獄。以朴延美自己為例，佢同媽咪穿越為咗多一線生機，不惜穿越沙漠，「跟住北斗星前進」、「跟住星星奔向自由」。