人人都要食飯，有食飯就要大便，但係到底有幾多個人痾得正確？科學家教路，大便時應該踎而唔係坐，因為踎低時肛門會完全張開，咁樣先至痾得清。
德國女作家Giulia Enders喺暢銷書籍《迷人的大腸》中講到，當人坐或企時，肛門周圍肌肉會壓住個出口，同時直腸無法拉直，阻礙排便：「就好似架車喺高速公路行行吓，突然遇到個灣位咁，要踩Brake。」
佢仲話有統計發現，世上有大約12億人無坐廁使用，大便時要踎低，而呢12億人腸憩問題遠較其他人少。至於習慣使用坐廁嘅人，大便時往往要更出力谷，對腸道構成壓力，咁又更容易生痔瘡；谷得太行更有可能會脫肛，好恐怖。
其實早喺2003年，以色列醫生Dov Sikirov就做過一個研究，請咗班人分別使用唔同方式痾屎。一組人坐喺42厘米高馬桶，一組人31厘米高，最後一組係踎低，發現踎低痾嗰組人排便時間需要大約50秒，其餘兩組人平均要用130秒，足以證明踎低痾比較暢順。當然膠仔唔排除啲人踎得攰所以草草了事，但人哋係專家，我唔係，唯有信佢。
咁用坐廁時點樣先可以痾得正確呢？《迷人的大腸》講咗個方法：試吓大便時加張凳喺前邊踩住，抬高對腳，令動作比較接近踎。為咗痾得健康，大家可以參考吓呢個方法。
神州快訊
** 博客文章文責自負,不代表本公司立場 **
唔係活在貧困線以下或者在職貧窮嘅香港人，飲食一般講求健康有營養，有機食物成為唔少人嘅首選。不過膠仔有樣嘢唔明，何解organic一詞譯成中文會變咗做有機？我睇咗幾本書，又長咗少少知識。原來有機一詞喺化學角度農學角度有唔少分別。以下內容可能比較深，我盡量講得淺白啲，有唔啱嘅麻煩大家指正！
起源
有機一詞最先喺19世紀出現。當時科學家認為所有有機物質只能透過生物合成，例如係消化、呼吸、光合作用等。與之相對嘅概念係無機，即係物質合成過程唔需要任何生物過程。呢個理論直到1828年德國科學家維勒做實驗時，意外合成出尿素之後被推翻。無論如何，有機一詞可以理解為「有生機、有生命力」，同生命機制息息相關。
化學定義
先講化學定義。科學家就過往資料進行整理分析時，發現所有機物中必然含有「碳」（C）分子，所以科學家一向都話「碳係地球上所有生命嘅基礎」。其後有研究指出，有機物質中一定會出現「碳氫鍵」（C-H），於是科學家又採用咗呢個分類方式去分辨物質屬於有機定係無機。
講到咁深，我舉吓例啦。水（H2O）同埋二氧化碳（CO2）等雖然有「氫」或者「碳」存在，但係因為無碳氫鍵，因此係無機物。殺蟲劑敵敵畏（C4H7Cl2O4P）同埋中風元兇膽固醇（C27H46O）等聽上去絕對唔健康嘅物質，因為化合物中有碳氫鍵，反而屬於有機物質。
農學定義
至於我哋平時提倡「有機飲食」嘅「有機」，其實係農學嘅定義，意思比較貼近最初「生機、生命力」，意味可以永續生產而唔影響自然環境。國際有機農業運動聯盟定義係：「有機農業係一種可以維護土壤、生態系統同埋人類健康嘅生產體系…… 結合傳統農業、創新思維同埋科學技術，保護各種生物嘅生存環境。」
香港政府食物安全中心出過期刊，介紹有機食品有咩好處，講到耕種時會以輪作、堆肥同埋生物防治蟲害等方法保持土壤質素；飼養動物時就會減少使用抗生素、激素同埋獸藥。食物質素方面，英國、法國同埋瑞典等國家早有研究表明，有機產品營養成分同普通食物營養大致相若，殘餘化學物含量亦相對較少，但係受霉菌毒素同埋微生物污染機會就較高。
