Plastic
秋風起，黃葉落，膠仔即將出發到日本關西睇紅葉，諗起都興奮。然而人生係一個無盡嘅學習過程，我想知點解有樹葉會變紅，有時會變黃。網上有條片講講箇中原因，中間涉及兩個唔同嘅生物過程。為怕太家睇唔明，我打多幾隻字稍稍解釋吓。
最籠統嘅講法係樹葉到秋天時會失去葉綠素，樹葉因此變黃，實情唔係咁簡單，中間仲有幾個生物過程。樹木落葉係為咗減少冬天能量消耗，喺「放棄」樹葉之前，樹木先要先回收葉面營養。
樹木喺換季之際要先拆解樹葉細胞同埋「光合器」，回收其中嘅氮同埋磷等重要養份，儲存到樹枝中等待春天再長葉。整個過程中，大約50%樹葉養份會返回樹木度。
一類樹木喺分解過程中，會拆解葉綠素成活躍度較低嘅代謝產物，而呢種物質顏色通常都係黃色或者透明，所以呢類樹木嘅葉會變黃。
另一類樹木則會先產生一種特殊色素包住表面，等葉綠素完全分解後直接掉落。呢種色素大多數都係紅色或者紫色嘅，所以我哋會見到有啲樹木會變成紅當當一片。
神州快訊
** 博客文章文責自負,不代表本公司立場 **
膠仔認識一批自閉症患者，不得不承認最初同佢相處真係幾困難，總覺佢哋對身邊人愛理不理，反而更容易對死物產生興趣。佢哋睇嘢角度同我唔同，旁人要花好多時間同心機先可以一步步了解佢哋嘅世界，箇中苦與樂，相信患者家人感受最深。一般市民因為無咩機會了解佢哋，往往造成好多誤解。今日我決定引述專家研究，以較科學嘅方法講講佢哋同我哋睇嘢方式有咩唔同。
美國加州理工學院最近利用眼球追蹤技術，分析自閉症患者同埋普通人睇圖片嘅目光會集中喺咩地方。結果顯示自閉人士睇嘢有套特別嘅系統，目光較少受到臉孔或者係有邏輯性嘅事物吸引，所以亦較難理解事物間嘅關係以及人嘅表情。以下係幾個例子，上圖係自閉人士嘅結果，下圖係普通人。
自閉症患者會較關注裁判反尾枕
正常人比較關注球員塊面
自閉人士較關注樹木同埋天空
普通人會睇象媽媽同象寶寶
自閉症患者淨係會望住個波
普通人就會留意埋個波從球員手指下飛出去嘅軌跡
膠仔最後以一個親身經歷作結。我識得一個叫Alex嘅自閉小朋友，過埋下個月生日就10歲，係我接觸過嘅自閉患者中最難「破冰」嘅一位。佢情緒極容易受嘈音影響，連地鐵埋站發出嘅聲音都可以令佢發脾氣大叫。好多路人都會因為咁樣遠遠避開，唔知係咪怕佢忽然發癲打人。
去年某日我幫Alex媽咪帶佢去社區中心活動，等過馬路時佢死睥住一個途人聽歌塞住耳仔，咁啱我又有個耳筒吊係頸度揈揈吓。Alex忽然大叫咗聲話「好嘈」就搶走我耳筒塞落自己耳仔。我唔知點算，唯有開音樂俾佢聽，自此佢見親我都要聽歌，而佢聽歌時從來都無發脾氣。
後嚟我同姑娘發現，Alex對耳非常靈敏，節奏感好，玩樂器勁，幾乎首首歌聽一次就可以即刻用鋼琴彈返出嚟，前提係佢根本無學過音樂。到嗰刻我先知道，其實係Alex對聲音太敏感，少少嘈音都足以令佢覺得好唔舒服。或者天才腦中所想，喺常人角度總係唔太正常啦。
