自閉患者眼中世界

膠仔認識一批自閉症患者，不得不承認最初同佢相處真係幾困難，總覺佢哋對身邊人愛理不理，反而更容易對死物產生興趣。佢哋睇嘢角度同我唔同，旁人要花好多時間同心機先可以一步步了解佢哋嘅世界，箇中苦與樂，相信患者家人感受最深。一般市民因為無咩機會了解佢哋，往往造成好多誤解。今日我決定引述專家研究，以較科學嘅方法講講佢哋同我哋睇嘢方式有咩唔同。

美國加州理工學院最近利用眼球追蹤技術，分析自閉症患者同埋普通人睇圖片嘅目光會集中喺咩地方。結果顯示自閉人士睇嘢有套特別嘅系統，目光較少受到臉孔或者係有邏輯性嘅事物吸引，所以亦較難理解事物間嘅關係以及人嘅表情。以下係幾個例子，上圖係自閉人士嘅結果，下圖係普通人。

自閉症患者會較關注裁判反尾枕

正常人比較關注球員塊面

自閉人士較關注樹木同埋天空

普通人會睇象媽媽同象寶寶

自閉症患者淨係會望住個波

普通人就會留意埋個波從球員手指下飛出去嘅軌跡

膠仔最後以一個親身經歷作結。我識得一個叫Alex嘅自閉小朋友，過埋下個月生日就10歲，係我接觸過嘅自閉患者中最難「破冰」嘅一位。佢情緒極容易受嘈音影響，連地鐵埋站發出嘅聲音都可以令佢發脾氣大叫。好多路人都會因為咁樣遠遠避開，唔知係咪怕佢忽然發癲打人。

去年某日我幫Alex媽咪帶佢去社區中心活動，等過馬路時佢死睥住一個途人聽歌塞住耳仔，咁啱我又有個耳筒吊係頸度揈揈吓。Alex忽然大叫咗聲話「好嘈」就搶走我耳筒塞落自己耳仔。我唔知點算，唯有開音樂俾佢聽，自此佢見親我都要聽歌，而佢聽歌時從來都無發脾氣。

後嚟我同姑娘發現，Alex對耳非常靈敏，節奏感好，玩樂器勁，幾乎首首歌聽一次就可以即刻用鋼琴彈返出嚟，前提係佢根本無學過音樂。到嗰刻我先知道，其實係Alex對聲音太敏感，少少嘈音都足以令佢覺得好唔舒服。或者天才腦中所想，喺常人角度總係唔太正常啦。

神州快訊

** 博客文章文責自負,不代表本公司立場 **

人人都要食飯，有食飯就要大便，但係到底有幾多個人痾得正確？科學家教路，大便時應該踎而唔係坐，因為踎低時肛門會完全張開，咁樣先至痾得清。

德國女作家Giulia Enders喺暢銷書籍《迷人的大腸》中講到，當人坐或企時，肛門周圍肌肉會壓住個出口，同時直腸無法拉直，阻礙排便：「就好似架車喺高速公路行行吓，突然遇到個灣位咁，要踩Brake。」

佢仲話有統計發現，世上有大約12億人無坐廁使用，大便時要踎低，而呢12億人腸憩問題遠較其他人少。至於習慣使用坐廁嘅人，大便時往往要更出力谷，對腸道構成壓力，咁又更容易生痔瘡；谷得太行更有可能會脫肛，好恐怖。

其實早喺2003年，以色列醫生Dov Sikirov就做過一個研究，請咗班人分別使用唔同方式痾屎。一組人坐喺42厘米高馬桶，一組人31厘米高，最後一組係踎低，發現踎低痾嗰組人排便時間需要大約50秒，其餘兩組人平均要用130秒，足以證明踎低痾比較暢順。當然膠仔唔排除啲人踎得攰所以草草了事，但人哋係專家，我唔係，唯有信佢。

咁用坐廁時點樣先可以痾得正確呢？《迷人的大腸》講咗個方法：試吓大便時加張凳喺前邊踩住，抬高對腳，令動作比較接近踎。為咗痾得健康，大家可以參考吓呢個方法。