刁佬話我哋工作室，男嘅就叫刁龍，女嘅叫刁鳯，靚女就係刁花，今期的刁文由刁鳳寫。我哋公司食飯時間是一點，多數啲人仲食緊未埋單，幸運啲等到一點三左右就有頭輪放飯的人離開，一點食飯實在逼到喊，時間又尷尬，又唔可以推遲到去下午茶時段，起碼平返幾十蚊，很多時一氣之下買外賣算。中環都幾多好嘢食，豐儉由人，地踎至高級餐廳一應概全，而且菜式選擇又多，行去上環食埋又得。
每次刁鳳途經九如方行上去搵食，就很搖頭嘆息，睇住班遊客拎本米芝蓮當聖經咁排隊食九記牛腩，一來心諗真係有乜咁好食值得排，二來就諗搵食咁簡單的事何必信奉權威。
與九記數街之隔的水記是工作室的心水之選，位於吉士笠街的斜路上，老實說這位置隱蔽到好幾次介紹畀人都唔識，水記在蘭芳園的盡頭，中環街市對面的巷仔入去，雪茄王國隔離上去，如果講到咁都唔識，真不知仲可以點描述。
在水記的斜路上，人人都斜住食，又奇在斜得來又唔會倒瀉，識坐的朋友會坐上位，坐下位就辛苦啲。水記是露天大排檔，冷氣欠奉，加上坐得又辛苦，極少見到有中環麗人坐低食，西裝友又反而唔少，咁嘅環境都會來食的中環人，一定係識食同為食之人。秋冬天氣就不錯，夏天就有點辛苦。
水記不開晚市，五點就收工，一日劏兩隻新鮮牛，最有名是他一日兩碗的牛沙瓜，基本上很少人有機會食到，因為要十一點去到先有機會。刁鳳有幸食過牛脆骨，牛脆骨是牛氣管，咬落爽口幾得意。一般十二點半開始連爽腩都賣哂，到一點半左右叫牛雜應該主要都係得大腸。雖然話營業時間到五點，但一般到三點就已經乜都賣哂收工，如果想食水記兼好嘢的朋友，一定要趁早。
刁鳳覺得有時摘得米芝蓮星都係一種咀咒，好旺角麵家總店在摘星後招來業主的注意，加租五成後結業。除了招惹地主外，摘星後亦會令一些老闆心態改變，記得仲係學生時期食添好運覺得驚為天人，到後來獲得米芝蓮冊封，人們蜂擁而至，添好運陸續開設分店，近年更進駐IFC。不過添好運的食物水平每況愈下，IFC店都係無嘢好食及周圍太多人先會去，唔講唔知以為入咗唐記包點。
不過亦有老闆非常清楚自己做緊乜，法國米芝蓮一星餐廳Le39V在香港開分店，一直享譽城內老饕，但如果要你離開基業重頭開始，你又有無膽？在Le39V結業後，餐廳總廚Aurelie Altemaire重開一間Odyssée，摒棄舊舖光環，仍然不掩光茫，去年摘下米芝蓮一星。
有人不需要星，有人迷失於星，有人永遠都是星，最終的成功，就是看誰能贏得食客的嘉許。無論食客定食肆，其實搵食都不用米芝蓮。
刁佬工作室
** 博客文章文責自負,不代表本公司立場 **
