新春密密訪 林鄭個人Show

馬年伊始，誰人最紅？相信「有商有量」的政務司司長林鄭月娥是也。年初一到年初四四天「紅假」，日日都見到林鄭月娥。

登上政府新聞網一看，舉目都是林司長芳蹤。咁又難怪，特首CY趁農曆新年放假，林鄭身兼署理行政長官同政務司司長，活動自然多籮蘿。

先數數林鄭這幾天有何活動？年初一，「紅卜卜」的林鄭跑四場，先去護理安老院向老友記拜年，之後到林村點燈祈福，再趕去深圳灣管制站探訪，前線人員打氣，最後還要出席「賀歲波」開幕禮。由公務員、基層、中產，跨階層可謂一網「冧」盡。

年初二，林鄭欣賞賀歲煙花匯演。

到了年初四，林鄭更一日走五場，去完西貢出席鄉委會活動，探探婦女和長者，之後馬不停蹄探訪低收入家庭，再去向九十四歲的福伯拜年。最後還要去到深水埗，探訪「劏房」和板間房住戶。

咪以為林太初三「偷懶」，一早起身打開收音機，又聽到電台播出錄音訪問，唔見樣，一樣有聲！

雖然囝囝Jeremy讀完書回港，林鄭照樣放假唔駛抖，行勻全港九新界，連最遠的邊境都殺埋，邊個夠佢咁好打呀！有少少新聞界經驗的人都知，新春係新聞淡季，呢幾日林鄭幾乎日日見報，曝光率高唔使講啦。仲要一班「粉絲」見到佢，猶如螞蟻見到蜜糖，一擁而上，沒有擲嘢架，「粉絲」咁捧場，難怪林鄭「四萬」咁口！

身為政制三人組之首，林鄭拜年之餘亦不忘推銷政改。睇怕勤力到咁，外界買佢可能參加特首跑馬仔，都唔係好奇啫。

巴士的團隊

Ariel

** 博客文章文責自負,不代表本公司立場 **

年廿九，本來以為新聞會靜啲，點知政府咁勤力接連做嘢，先有特首CY宣布制裁菲律賓，該國外交人員來港不再有免簽證，然又出暫停申請港台撥款的新聞，做到記者氣都咳。

兩單新聞可謂前後腳，CY在下午5點半出來講制裁菲律賓，5點41分講完，5點44分就出稿講港台撥款。牌面觀察，政府咁「英」去制裁菲律賓，點都攞番少少分。但暫停申請港台撥款，就恐怕在港台同情者眼中是失分行為，一加一減，似乎都頂得吓喎。斷估無痛苦，政府又係唔係有心搞單制裁賓仔出來，攞吓分溝淡反對聲音呢又?

講開政府搞賓仔，都好似有前科，上次立法會討論用唔用特權法去查電視發牌事件前夕， CY就在11月5日出來講要定出對菲律賓一個月的死線，無進展就會制裁。首次向賓仔開刀，沖淡一吓緊張的政治氣氛。

不過，知情人士就話年廿九呢個日子唔係佢哋揀，只能話係賓仔自己游埋嚟俾人砌，話說11月5日特首許下一個月限期後，到咗12月5日，有啲進展，包括賠償、道歉等問題的商討，諗住俾大家多兩個月空間。

 

依家又快到2月5日的限期，加上過年係中國人的大日子，政府都想同家屬有交代，近期確係又俾壓力菲律賓方面，唔知係迷逼得緊，菲律賓方面今日(周三)中午覆咗，政府就唔係咁滿意，即刻通知家屬，家屬及傷者都齊聲話唔接受。

 

政府係可以唔使即刻覆，但時間上如果今日唔作出決定，等到農曆新年後，驚菲律賓方面以為政府在接受與唔接受之間，好似「議而不決，決而不行」咁，既然家屬和傷者都不接受對方的答覆，不如就一舖過去馬啦。

 

至於撤回港台新大樓撥款，知情者就話個別政策局按各自程序處理，至於有冇人見到有制裁菲律賓呢單嘢遮擋，馬上公布埋就唔知喇，總之就話冇協調過。

 

咁講法，借賓仔過橋的唔通係蘇局長？

巴士的團隊