年廿九，本來以為新聞會靜啲，點知政府咁勤力接連做嘢，先有特首CY宣布制裁菲律賓，該國外交人員來港不再有免簽證，然又出暫停申請港台撥款的新聞，做到記者氣都咳。
兩單新聞可謂前後腳，CY在下午5點半出來講制裁菲律賓，5點41分講完，5點44分就出稿講港台撥款。牌面觀察，政府咁「英」去制裁菲律賓，點都攞番少少分。但暫停申請港台撥款，就恐怕在港台同情者眼中是失分行為，一加一減，似乎都頂得吓喎。斷估無痛苦，政府又係唔係有心搞單制裁賓仔出來，攞吓分溝淡反對聲音呢又?
講開政府搞賓仔，都好似有前科，上次立法會討論用唔用特權法去查電視發牌事件前夕， CY就在11月5日出來講要定出對菲律賓一個月的死線，無進展就會制裁。首次向賓仔開刀，沖淡一吓緊張的政治氣氛。
不過，知情人士就話年廿九呢個日子唔係佢哋揀，只能話係賓仔自己游埋嚟俾人砌，話說11月5日特首許下一個月限期後，到咗12月5日，有啲進展，包括賠償、道歉等問題的商討，諗住俾大家多兩個月空間。
依家又快到2月5日的限期，加上過年係中國人的大日子，政府都想同家屬有交代，近期確係又俾壓力菲律賓方面，唔知係迷逼得緊，菲律賓方面今日(周三)中午覆咗，政府就唔係咁滿意，即刻通知家屬，家屬及傷者都齊聲話唔接受。
政府係可以唔使即刻覆，但時間上如果今日唔作出決定，等到農曆新年後，驚菲律賓方面以為政府在接受與唔接受之間，好似「議而不決，決而不行」咁，既然家屬和傷者都不接受對方的答覆，不如就一舖過去馬啦。
至於撤回港台新大樓撥款，知情者就話個別政策局按各自程序處理，至於有冇人見到有制裁菲律賓呢單嘢遮擋，馬上公布埋就唔知喇，總之就話冇協調過。
咁講法，借賓仔過橋的唔通係蘇局長？
巴士的團隊
Ariel
** 博客文章文責自負,不代表本公司立場 **
《壹週刊》出封面故仔指控莎莎賣過期貨品，搞到莎莎股價昨日大插6%。莎莎亦以最重力度回擊壹仔，除了今日在全港各大暢銷報紙出全版聲明澄清之外，亦已入禀告壹仔。
據聞壹仔落足工夫去「做」莎莎，搵咗個後生記者扮搵工，到莎莎返工放蛇，一做就做咗半年，結果搞出圖文並茂。但壹仔無講明自己放蛇去搞，只係話「本刊接獲投訴並查證」、「有目擊者拍下證據」等等。
由於壹仔故仔出街前追訪咗莎莎主席郭少明攞回應，莎莎知道壹仔會做佢世界，急急找了相關分店查證，查完就好有信心咁話，公司設有特賣場銷售少於6個月品質保證期的化妝品，而少於1個月品質保證期的健康食品及成藥必須下架，分店的主管及員工沒有動機要促銷過期貨品。
莎莎對事件非常「嬲」，已經請咗城中最勁打誹謗的資深大狀Jason Pow鮑永年代表告壹仔，Jason Pow係資深大狀清洪的大弟子，打誹謗好叻，見到莎莎搵Jason Pow出手，就知呢單官司好大機會一直打落去，唔係入禀嚇吓人咁簡單。
過去也出現過幾單知名品牌被傳媒指控事件，其中霸王洗頭水一案，又係壹仔的故仔，結果令霸王的銷售大插。有前車之鑑，莎莎對事件極度緊張，唔敢掉以輕心，會全力反擊去力保商譽。講開又講，誹謗官排期審都要排好耐，霸王告壹仔的誹謗案，幾年前發生，排到明年才開審。
