壹仔放蛇半年「做」莎莎

《壹週刊》出封面故仔指控莎莎賣過期貨品，搞到莎莎股價昨日大插6%。莎莎亦以最重力度回擊壹仔，除了今日在全港各大暢銷報紙出全版聲明澄清之外，亦已入禀告壹仔。

 

據聞壹仔落足工夫去「做」莎莎，搵咗個後生記者扮搵工，到莎莎返工放蛇，一做就做咗半年，結果搞出圖文並茂。但壹仔無講明自己放蛇去搞，只係話「本刊接獲投訴並查證」、「有目擊者拍下證據」等等。

 

由於壹仔故仔出街前追訪咗莎莎主席郭少明攞回應，莎莎知道壹仔會做佢世界，急急找了相關分店查證，查完就好有信心咁話，公司設有特賣場銷售少於6個月品質保證期的化妝品，而少於1個月品質保證期的健康食品及成藥必須下架，分店的主管及員工沒有動機要促銷過期貨品。

 

莎莎對事件非常「嬲」，已經請咗城中最勁打誹謗的資深大狀Jason Pow鮑永年代表告壹仔，Jason Pow係資深大狀清洪的大弟子，打誹謗好叻，見到莎莎搵Jason Pow出手，就知呢單官司好大機會一直打落去，唔係入禀嚇吓人咁簡單。

 

過去也出現過幾單知名品牌被傳媒指控事件，其中霸王洗頭水一案，又係壹仔的故仔，結果令霸王的銷售大插。有前車之鑑，莎莎對事件極度緊張，唔敢掉以輕心，會全力反擊去力保商譽。講開又講，誹謗官排期審都要排好耐，霸王告壹仔的誹謗案，幾年前發生，排到明年才開審。

Ariel

** 博客文章文責自負,不代表本公司立場 **

政府早前完成本港接待旅客能力的評估，估計到2017年訪港旅客將增加至超過七千萬，認為大致能夠承受到，到2023年估計會突破一億添，聽到呢個數都幾嚇人。點知商務及經濟發展局的蘇局長，唔似有備而戰咁，冇咩特別的應對方案之餘，仲講咁句，市民要等多班車，有啲不便啦。

今日蘇局長再上立法會解畫，講來講去又係增加景點分流旅客，冇好實質的全盤計劃應對，要知道今時今日做得問責官員，推行一項政策或者公布調查數字，都要有啲政治敏感度，現時反內地遊客的情緒雖然比之前冇咁高，但始終係一個好易被挑起的議題。

聞說政府高層對蘇局長的做法亦有啲摸不着頭腦，你話以佢的背景同過往表現，又唔似係有心玩嘢，但明明有炸彈，又好似唔察覺咁就拋出來，高層提起呢位蘇局長，都齊齊：唉…！一聲。

  

或者蘇局長，應該放低身段，感受一下平民化生活，依家市民搭車、行商場超市，旅客人頭湧湧，好話唔好聽，用晒牙膏，落街去超市買都逼滿掃貨的內地旅客，排長龍為買支牙膏，都幾影響日常生活。

明知評估出來旅客數字增長到1億咁驚人，係唔係要公布係一個問題。若然要公布，蘇局長應該研究吓有咩紓緩措施，一齊公布埋，唔係一句話同內地保持溝通，確保港人生活，不會因為旅客增加受太大影響。市民完全感受唔到政府做咗嘢，或者做緊咩嘢應對旅客增加帶來的影響。