北上廣深各擅勝場｜刁佬

政府成日呼籲大家北上發展，又云大灣區多機遇，經常推出政策叫大家返去工作生活，眾多的地產經紀除了推新盤外，就是推大灣區盤。近年咁多新晉內地富豪崛起，連啟德地皮都多內地發展商參與，似乎想發達點都要北望神州。

不過北上定義遼闊，香港以北都可以稱為北上，烏魯木齊同深圳都已經好唔同啦。大灣區內肇慶同廣州又係差得遠。刁鳳於是請教下初出茅廬便馳騁神州大地做核數的刁佬，遠的不討論，就討論國內城市的四大藍籌－北上廣深。

北上廣深名列首位的北京，自明代以來就是皇帝定居之都，現在中國國家領導人居住的中南海，亦是明清紫禁城的一部份。單單說這點便知道北京定都歷史悠久，政治氣息已植根於整個城市。在北京工作的刁佬，大多擅於利用政治關係抓批文，精準出擊國家政策，長袖善舞者眾，動手工作者少。所以前輩留存一金句，到了北京才知官小，刁佬就話去到北京才知刁細，京城討論的刁要有跨國格局，少個零都比人笑。

上海則是一個普通話版的香港，商業活動發達，自然好玩既嘢都多。內地人稱上海為魔都，在刁佬眼中上海是一座罪惡之城，美女、物質、金錢、權力及誘惑的集中地，只有你想不到，沒有買不到。所以刁佬對一眾出差上海的兄弟都十分凝重提點，小心女人，尤其是在上海！上海美女集台灣的嬌嗲、北京的知書識禮、香港的國際視野於一身，未討論身材都已是尤物，好多出差上海的英雄難過上海妹一關。刁佬有位兄弟做咗上海姑爺，婚前女友洗衫煮飯，打不還手，罵不還口，當時簡直係男人的偶像。婚後角色易位，他與其他上海姑爺互聯互通才知這不是個別慘案。所以上海姑爺婚前無得頂，婚後無咗影。兄弟到明白之時，對唔住，你已落咗坑。順便一提各位兄弟，好多上海妹已知自己天下馳名，因此自稱江蘇妹。以後兄弟們聽到江蘇妹自己睇路啦。

刁鳳心諗刁佬講上海花了咁多篇幅講上海姑爺，唔知係咪曾經身同感受，不過刁鳳都係想知去邊度淘金好。刁佬話現在廣州已很少有廣東人，地理位置上亦離北京遠。講起廣州，刁鳳個腦就想起炳勝的菠蘿叉燒包、蓮香的點心及上下九的雙皮奶。全中國的菜系都受川菜了的影響，不多不少都喜歡加麻加辣。有次刁鳳去南京，明明說好的是浙江菜，都加了辣。現在唯獨得返粵菜仍可堅守傳統，運用食材本身的優點，抗擊麻辣。

至於深圳，相信係香港人去得最多的大陸。現今的深圳尤如聯合國，不同國藉的人都來這裡淘金，深圳將來會取代上海成為冒險家樂園。許多新崛起的富豪，早年都係於深圳發跡，而且各行業都有。深圳在鄧小平南下講話後成為經濟特區，鄰近香港亦因而受香港影響大，又係離香港最近的內地城市，對內地人來說走錢相當方便。

刁佬工作室

** 博客文章文責自負,不代表本公司立場 **

相信好多人都會覺得刁佬嘅生活周旋於權貴與老闆之間做交易，必定有好多待人接嘅秘方。其實唔係有啲乜嘢特別，不過因為更加近距離面對呢一啲大人物我哋對於佢哋日常生活有更深切嘅體會。喺呢度同大家分享一下，一啲冇人相信但係好簡單，而且可以做得到嘅方法。

其實對住權貴或者有錢老闆，一個成語就已經可以概括我哋既行為守則，最有效嘅方式就係「不亢不卑」。其實好多人都會以為對住權貴或者老闆，需要額外畀多一分尊重，小心你嘅言行，更加要照顧好老闆嘅弱小心靈。其實喺刁佬眼中呢啲都唔係最重要的。老闆搵你開會，需要嘅係正確嘅資訊，老闆最憎嘅就係有人浪費佢嘅時間，因為老闆有錢，有人，就係冇時間，佢同你一樣，每日都係得廿四個鐘，佢會覺得如果你兜圈，講埋一大堆廢話，都講唔到重點，就係嘥佢時間。就算你講到天花亂墜，無論點都好都會覺得，佢最寶貴嘅資產俾你喺度浪費緊。所以對住老闆嘅時候，只要有禮貌地切入重點，講出需要嘅資訊就好足夠，當然老闆未必係技術人員，好多時候未必明一啲高深嘅複雜嘅交易結構或者資料，但係做得老闆心中條數都係雪亮的。只要你大概講出方案，具體操作細節可以略過不提，老闆自然知道如何解決當前嘅問題。

另一方面，大家唔好忘記老闆都係人，同你一樣，要食飯了瞓覺，呢啲廢話刁佬都講出嚟，可能你會覺得好奇怪，不過大家有冇諗過點解老闆好多時候都好鍾意叫人加班或者係禮拜六日開會。喺呢度刁佬就出賣一下老闆們嘅小秘密，其實好多老闆喺公司叱吒風雲，返到屋企一樣係一個丈夫及父親，各位讀者如果做得人老公同老竇，應該知道呢個身份係有幾無助同幾咁卑微。做得人老竇同老公嘅都知道，呼風喚雨嘅係對方，默默承受同付出，係你嘅責任。如果你係老闆，你鍾意返工，萬人之上，定係返到屋企，做一個卑微嘅浮游生物？ 如果禮拜六日，當老婆唔理你，啲仔女唔同你食早餐，亦都唔睬你，喺屋企除咗俾人糟質，就係做家頭細務，同比人點去做日常生活你最唔想做嘅事，你會唔會寧願返公司開會呢。

老闆都係人，正常地佢都會作出對自己心靈比較舒適嘅選擇。喺呢度希望大家明白當老闆叫你週末放假其間開會，咪當係安撫一下老闆嘅弱小心靈，盡量幫下忙啦。