郭炳江花了1億律師費!

香港無乜行業好做，最好都係做金牙大狀，新鴻基地產郭氏兄弟涉及前政務司司長許仕仁一案，要等今年5月才開審，不過官司未打，新地二佬江少和三弟聯少請大狀粒粒皆星，夾埋已花了1億5000萬律師費，真係可以用「得人驚」三個字去形容。

江少花費最鉅，行內估佢已經用咗1億律師費，主要係大狀收。江少用咁多錢，皆因佢個法律團隊中御用大狀(英國外聘)和資深大狀(本地)最多，計有英國女御用大狀Clare Montgomery，佢曾為毛玉萍及林炳昌打終審法院上訴案，另外還有香港資深大狀駱應淦、夏偉志和余承章。單是自去年7月開始包起英國重炮Clare Montgomery為佢打官司，已使咗3000萬。

聯少用的英國御用大狀是John Kelsey Fry及香港資深大狀麥高義，由於資深大狀無江少咁多，估計律師費經濟一點，至今約用了5000萬。少少地都5000萬啦。

至於已被頒令破產的許老爺，就無咁多錢請資深大狀，只是請了本地大狀蔡維邦，外界本來估佢會用法援署的大狀，但佢又無用，相信要由許太支付律師費，咁當然好難請得起資深大狀打咁耐官司啦。

至於政府的律師團隊也是黃金陣容，用的是英國御用大狀David Perry和香港資深大狀謝華淵，政府用公家錢打官司，多多錢都出得起。政府之前請過David Perry打陽明山莊殺夫案和陳振聰偽造遺囑案，兩單都入罪，十分之強勁。

行內稱呢單為「世紀刑事官司」(講花費一定係)，未開審律師都咁驚人，皆因新地兩兄弟請得御用大狀和資深大狀多，而且好多都係全面包起佢地，叫佢地打新地案期間唔好接其他官司，全力去打呢單案，再加上英國過來的御用大狀又包食住五六星級酒店和機票，條數計起上來十分驚人。

睇完呢單嘢，有無諗住谷個仔女去讀law呢?

Ariel

** 博客文章文責自負,不代表本公司立場 **

新年流流上法庭，好多人都會愁眉不展，唯獨好有個人風格的Dream Bear劉夢熊果然與眾不同。

佢除了例牌在法庭門外，對守候的記者整幾句金句之外﹐踏入火馬年，佢來一陣風風火火，竟然在現場大派利是。

只見夢熊向採訪的攝影記者派利是，每封100元。

新正頭，派吓利是唔少人都可能覺得係取其好意頭，但記者接又唔係唔接又要左推右推。記者採訪遇著呢種情況收咗利是，各家有各家的規矩，一般都有申報同上繳方式處理。

之但係夢熊今次咁派法，就真係令人大開眼界喔，在法庭內外大派利是，會唔會有啲瓜田李下呢？！

巴士的團隊