男校飯堂｜刁佬

刁佬中學時期轉過好幾間學校，全部都係男校，古有孟母三遷，刁佬都讀遍港九新界，作為一個頻密轉校的學生，好多時同學都已有既定玩開的圈子，轉個頭都唔記得你呢位插班生。時至今天刁佬都慶幸仍與同學們保持聯絡，前排大家仲一齊夾份於紅隧賣廣告。

講到聯誼維繫感情，一定少不了約埋一齊食飯，唔怪得知好多同鄉會都會搞餐廳，一來讓大家吃家鄉菜治思鄉病，二來有個聚腳點供大家憶當年。有好幾間男校都有私家的校友飯堂，甚有水準，香港大學都有舊生會飯堂，反而好似未聽過有女校有舊生會餐廳。

最出名的男校飯堂，第一順位應該係皇仁舊生會，就算係舊生都要以月計地等待，同米芝蓮星級餐廳無乜分別。不過偶爾有機會有人爽約，一早同佢哋講定想隨時後補，便可執死雞。皇仁舊生會名物多不勝數，其中蜜餞桂花炸蠔，粉漿皮薄，內裡蠔肉肥美爆汁，配上蜜餞桂花黏甜又清香。

刁佬平時同客食飯，閒閒地埋單位以千計，上萬一位都不少。不過即使食到上萬元一位，都已不是八九十年代下下宴客鮑參翅肚，相比起當年，現在宴客講求精緻，食材刁鑽，講究烹調技巧，間唔中更要清淡。佛跳牆呢類菜式已多年無食過，即使去福臨門食飯都未必會叫，但來到皇仁舊生會是必食菜式，鮑魚雖然不是乾鮑，但係各材料都已燉得十分入味，不是只得咸鮮，大家飲完湯後，經常爭食金華火腿及雞肉。

校友會的餐廳，多數是以會所形式經營，濟記飯堂是九龍聖芳濟書院一班校友集資成立。飯堂位於荃灣的工廈內，單位的座位數目不多，但預約程度又未去到皇仁咁誇張。相對於皇仁舊生會餐廳的傳統做大菜風格，濟記飯堂港式中又偶爾加入一些西式配搭，比較有家常感，例如牛坑腩煲、牛油焗蜆及咕嚕肉等。其中甜品的芒果蛋糕甚有驚喜，在市面上食的蛋糕都很鬆軟，像風一樣，但呢度食到從前細個的雞蛋糕飽實感。

兩間校友會餐廳都係免開瓶費，真係好適合一大班兄弟把酒當歌，相約回首往事。

刁佬工作室

** 博客文章文責自負,不代表本公司立場 **

一直以來在企業融資財務顧問的工作之中大部份以男性為主導，所以如果有一些行家請到新的漂亮女同事，行內馬上掀起whatapps風暴，在有圖有真相的年代，我們好快就會做好調硏工作。刁佬有幸在工作上請過幾位行內顏值極高的女同事，不到一星期全中環你各位大哥及客戶都向小弟約開會見面，又話敍舊，又話有新生意介紹，其實就係想來睇吓靚女。

另一方面好男人就好少有人特登過嚟鑒賞下了，這個大家都十分明白。好男人不代表是小鮮肉，我們的鑒賞角度全部屬於內在美，仲係非常內在的那一種。所以我哋呢一班唔知自己好定唔好嘅男人好多時候都會圍爐取暖，互相訴說日常生活中的辛酸。

一班男人坐低不外乎講吓工作、講吓車、講吓買樓或者講吓市場八卦。上個禮拜刁佬工作室一班男同事坐低，大家吐吐苦水，分享作為一個好男人的辛酸。因為同事間有一位揸開跑車嘅公子哥兒，突然間要換一㗎七人車，大家都明白一個喺中環闖蕩叱咤江湖十多年的兄弟，有一㗎跑車已經係不得了，叫佢擺低架跑車，慘過叫佢去死。但係冇辦法，亞嫂聽從黨嘅指示，俾個驚喜老公，有咗第二胎。無論如何都要好兄弟買㗎七人車照顧一家人，我哋大家都施以同情嘅眼神，言談之中發覺其實男人揸咩車代表佢係點樣嘅心性，最後得出結論，要作為一個好男人，我哋首先要可靠，唔可以成日病，更加唔可以入廠大修！任勞任怨風雨不改咁去接送我哋嘅家人，仲有必須為家庭支出附上尋重嘅責任，所以無論㗎車可以揸得幾快，只要皇后一聲令下，我哋都要跟從市區內不准超過50公里的家庭時速！呢位公子買車雖然有豐厚嘅預算，但係最後大家都一致認為佢只可以揸一架唔會壞、可以行走港九各地、負責招呼兩名小朋友容易上落的家庭車。當然大家都有一份小心思，希望佢可以平啲將佢加辣跑以優惠嘅二手價讓給其他好兄弟。

刁佬見到好兄弟心如止水，離死不遠，唯有將錦囊妙計交俾佢，只要再準備多幾百萬就可以擁有保住佢架辣跑，好兄弟問點解要咁貴？ 刁佬只好詳細和盤托出，佢首先要擁有多一個車位，再去買一架七人車，跟住再準備幾十萬，給皇后大人買包包填補佢心靈的創傷。所以大家明白生命誠可貴，自由價更高！一個男人想有自由，首先必須要擁有足夠的財力。買多架車好簡單，不過要皇上批准必須要準備好足夠的彈藥。最後刁佬以絕望的眼神，話俾佢聽我都仲係揸緊一㗎日本七人車，他還以苦笑，明白呢位過來人的好兄弟是真心真意分享自己的悲慘故事。