許志安杜德偉撞樣事件重演 雲海認錯保錡同肥仔

依家人人戴口罩，又真係容易認錯嘅～

人有相似，藝人撞樣事件時有發生，最經典一次莫過於有網民將許志安認錯成杜德偉，仲話：「條友好寸，叫佢杜生都唔睬人。」而C AllStar成員陳健安（On仔）又試過被人誤認係曹永廉。

有網民話見到杜德偉唔睬人，呢個都算經典。

ON仔話試過畀人認錯似曹永廉。

最近旅遊達人、網絡主持兼作家，總之就瓣數多多嘅前DJ雲海，日前就喺社交網出咗個Post，話去睇《毒魔》IMAX特別場嘅時候勁驚喜，因為右手邊坐咗幾個ERROR同MIRROR 成員，睇完戲佢就硬着頭皮問阿Dee影咗張合照，跟手就再數遠少少嘅Lokman、Alton，但由於戲院好黑，大家又戴住口罩，佢就見到疑似保錡同肥仔嘅身影，仲偷拍咗一張相，但佢朋友就堅持話唔係，叫網民幫手認一認。

雲海出Post話見到保錡同肥仔，但朋友話唔似，求真相。

網民即發揮「柯南」嘅偵探頭腦，都覺得唔係好對路，話肥仔好少戴眼鏡，另有人話見到保錡當晚其實係同女友沙律一齊去睇，所以應該唔係佢哋兩位。

呢個先係保錡，同安俊豪一樣咁高大。

安俊豪同保錡一樣都染咗銀白色頭髮。

最後兩位當事人出嚟認頭，原來染咗白色頭髮嗰位唔係保錡，而係另一位歌手安俊豪，佢尷尷尬尬咁話：「HI EVERYONE!!令大家失望，白色頭髮係我嚟。」仲順帶hard sell新歌《失蹤72小時》，好識借機會宣傳。而「肥仔」其實係香港樂隊神奇膠主音日新。

最後當事人安俊豪現身。

被雲海認錯係肥仔，其實係樂隊神奇膠主音日新（左二）。

原來「肥仔」係日新。