日前元朗發生一宗嚴重車禍引起廣泛關注，意外片段實在令人感到心寒。膠仔另外睇咗條片，用物理學角度分析車禍嚴重程度。同大家分享吓，當係再次警告開車唔好太心急。
睇片之前膠仔先簡單講一下少少數字。每升汽油大約含有56兆焦耳能量，足夠一部焗爐全力開動22小時，比同等份量嘅黃色炸藥都要強。目前大部份汽車就係通過燃燒汽油，將化學能量轉為動能去驅動車輛，當中80%能量會轉化為熱能流損，不過餘下20%能量仍然相當可觀，只需五茶匙汽油已經夠令一輛重達2噸嘅汽車從零加速到時速60公里。如果想架車繼續維持時速60公里行駛，每分鐘需要另外三分一杯汽油。呢個時候架車產生嘅撞擊力就已經等於一隻大笨象由三樓跳落樓咁多。
煞車時，汽車產生嘅動力會轉變成熱力散走。若不幸撞車，呢啲能量就會完全由汽車外殼吸收變形。大部份汽車車頭車尾都會有部部分突出，除咗係因為要預留空間放零件之外，同時亦係用嚟加長撞擊變形嘅緩衝區，等人唔使百分百「硬食」所有衝擊力。仲有，汽車通常都會裝有防撞欄之類裝置，又可以減少一部份衝力。
不過撞車時車身通常都無法吸收晒等於成隻大笨象跌落街咁多嘅力量，餘下能量就要由人體承受。同樣以時速60公里、車重兩噸嚟計，撞擊一刻人體承受嘅壓力，比戰鬥機師承受嘅壓力仲要大。
最後去片：
[embed]https://youtu.be/v9ML4GA47Rg[/embed]
神州快訊
** 博客文章文責自負,不代表本公司立場 **
香港人經常在外用餐，餐餐多肉少菜，便秘成為常見都市病。膠仔有個老友同樣深受腸道問題困擾，經常飽飽滯滯食唔落嘢。早排舊同學聚會，另一位相當熱愛跑步嘅朋友提議佢除咗盡量食多啲菜之外，可以試吓一齊跑步。膠仔事後諗落都覺得係，似乎有做運動嗰幾日大便真係順啲，於是上網查咗少少資料，發現有醫生都同意呢一點。
賓夕凡尼亞州埃克斯頓市內科醫生Christine Meyer係海外慈善跑「team CMMD」發起人，話長跑比賽中經常傳出同瀬屎瀬尿有關嘅搞笑新聞。膠仔記得最著名一單要數瑞典馬拉松選手Mikael Ekvall 2008年比賽途中大爆發，但仍然堅持完成比賽，賽後獲封為「便便人」。
Christine指出，跑步的確有助排便。佢話跑步時手腳擺動同埋腹部肌肉收緊都會促進腸道蠕動，消化更快。運動時身體又會釋放荷爾蒙，增加大腸壁敏感度，導致腸道大暴走。跑手完成比賽後如果會攝取葡萄糖的話，血糖指數升高，又會進一步令大腸受刺激。簡單而言，跑步除咗鍛鍊肌肉之外，同時亦會提高消化系統表現，令人急意更濃。
另外有科學研究指出，當人類神經緊張時，好容易進入「戰鬥或逃跑」嘅狀態，迅速跑走遠離危險。部分人喺跑步過程中，潛意識會指示身體加速，其中一個方法可能就係急屎急尿。不過呢個係好耐之前嘅研究，仲要係英國大學做嘅，未有進一步資料證實。
要避免跑步時急屎，特別係準備參加長跑時，原文作者話最好做法係跑步之前屙定先，仲提出幾個方法鼓勵大腸蠕動，包括以下幾招：
1. 早啲起身等腸道更早開始活動；
2. 食早餐；
3. 按摩腰部同大腿；
4. 提早少少做熱身。
原文：
http://www.phillymag.com/be-well-philly/2015/12/08/why-running-makes-you-poop/
http://www.runnersworld.com/health/how-to-make-yourself-poop
