跑步助排便

香港人經常在外用餐，餐餐多肉少菜，便秘成為常見都市病。膠仔有個老友同樣深受腸道問題困擾，經常飽飽滯滯食唔落嘢。早排舊同學聚會，另一位相當熱愛跑步嘅朋友提議佢除咗盡量食多啲菜之外，可以試吓一齊跑步。膠仔事後諗落都覺得係，似乎有做運動嗰幾日大便真係順啲，於是上網查咗少少資料，發現有醫生都同意呢一點。

賓夕凡尼亞州埃克斯頓市內科醫生Christine Meyer係海外慈善跑「team CMMD」發起人，話長跑比賽中經常傳出同瀬屎瀬尿有關嘅搞笑新聞。膠仔記得最著名一單要數瑞典馬拉松選手Mikael Ekvall 2008年比賽途中大爆發，但仍然堅持完成比賽，賽後獲封為「便便人」。

Christine指出，跑步的確有助排便。佢話跑步時手腳擺動同埋腹部肌肉收緊都會促進腸道蠕動，消化更快。運動時身體又會釋放荷爾蒙，增加大腸壁敏感度，導致腸道大暴走。跑手完成比賽後如果會攝取葡萄糖的話，血糖指數升高，又會進一步令大腸受刺激。簡單而言，跑步除咗鍛鍊肌肉之外，同時亦會提高消化系統表現，令人急意更濃。

另外有科學研究指出，當人類神經緊張時，好容易進入「戰鬥或逃跑」嘅狀態，迅速跑走遠離危險。部分人喺跑步過程中，潛意識會指示身體加速，其中一個方法可能就係急屎急尿。不過呢個係好耐之前嘅研究，仲要係英國大學做嘅，未有進一步資料證實。

要避免跑步時急屎，特別係準備參加長跑時，原文作者話最好做法係跑步之前屙定先，仲提出幾個方法鼓勵大腸蠕動，包括以下幾招：
1. 早啲起身等腸道更早開始活動；
2. 食早餐；
3. 按摩腰部同大腿；
4. 提早少少做熱身。

原文：
http://www.phillymag.com/be-well-philly/2015/12/08/why-running-makes-you-poop/

http://www.runnersworld.com/health/how-to-make-yourself-poop

神州快訊

** 博客文章文責自負,不代表本公司立場 **

隨住中國經濟起飛，一班有錢但係無咩文化嘅中國客湧到全球各地旅遊，打尖、亂扔垃圾、大聲喧嘩等不文明行為嚇到多個國家嘅旅遊景點貼告示明言謝絕中國遊客。膠仔認為中國遊客失禮情況可能仲要持續兩到三代人先有望改變，情況就好似上世紀70、80年代嘅日本咁。

最近一本日本月刊引述年約50歲嘅商務公司女職員，話中國遊客嘅失禮令佢諗起自己幾十年前到海外工作嘅往事：「現在日本人和中國人的分別很明顯，外國人單看行為都可以輕易分辨到。可是我仍然記得20年前日本人和中國人在歐美國家都只能被視作亞洲人來看待。有酒店會寫明謝絕亞洲人趕日本人出店外。我們就是因為曾經受過如此差別的對待，經過深刻反省和檢討後，才讓日本人成為禮儀之國。」

膠仔翻查資料，發現日本係喺1964年正式開放出境旅遊。70、80年代日本進入經濟奇蹟時期，國民變到超有錢，紛紛到海外旅遊。無奈佢哋銀包變得脹卜卜之際，文化修養遠遠追唔上，喺海外做出超多失禮行為。1980年代，歐美報紙雜誌經常報道日本人喺海外景點嘅失禮行為，有人表現一副「我俾咗錢所以大晒」嘅態度；日本女士鍾意瘋狂掃貨，仿佛前世未買過嘢咁；仲有人隨地吐痰、亂丟垃圾；惡名昭著如近年中國遊客。

另有一位年約60歲嘅嬸嬸諗起20年前同老公一齊到法國旅遊，見到同行遊客嘅過火行為，搞到佢同樣身為日本人都覺得非常唔好意思：「當時巴黎一個教會正在進行莊嚴的彌撒，人人非常安靜。這時候忽然有幾個日本旅遊團走入會場開閃光燈亂拍一通，非常失禮。同行還有年輕人因為穿着迷你裙入教會，被職員特醒要注意一下。」

直到1991年，日本運輸省（即現今國土交通省）列出日本人喺海外廣受批判嘅行為，通過一系列宣傳提醒大家去旅行應該有咩表現，包括將宣傳片製成錄影帶喺飛機上播、製作小冊子夾喺旅遊書中內等等，日本全國先終於學識跟隨舉世通用嘅禮儀去行事。換句話說，由開放旅遊到成為「禮儀之國」，日本人前後用咗30年時間。

至於中國嘛，因為人口眾多，膠仔覺得可能需要更多時間去改變，其中最關鍵嘅就係教育。寫到呢度，我忽然記得早幾年仲讀緊大學時，喺九龍塘火車站沙福道出口外邊間便利店度，見到個內地媽咪拖住個女打尖，一個港男忍唔住叫佢排隊，結果觸發中港大戰。就喺雙方嘈到拆天之際，個小妹妹忽然講咗句：「媽媽，老師說插隊是不對的，我們還是排後邊吧。」講真，嗰下我有少少感動。

原文：
http://www.zakzak.co.jp/society/foreign/news/20151118/frn1511181931012-n1.htm