夏萍晨報玩埋一齊

嘩！嘩！原來正在籌備的《香港晨報》，果然係同夏萍有關，早前行內已傳出《香港晨報》同暫時停刊的《新晚報》老總夏萍有關，大家仲記唔記得邊個夏萍，本網曾報道佢舉行過咗個「史上最騎呢記者會」，新晚報又出過一份原子筆寫「史上最騎呢的通告」。

有人放料俾網上傳媒《852郵報》，收到一份疑為《香港晨報》的報刊註冊登記文件，顯示該報的承印公司名為All Leader Publication Group Ltd.，由夏萍和霍漢的公司控股，即係晨報的承印公司由夏萍控制。

呢位夏萍女士早前搞咗份《新晚報》，暫時停咗刊，但佢間公司並冇印刷能力，佢間公司點承印《香港晨報》呢? 當然可以將印刷再判出去，之前佢份《新晚報》都係搵深圳特區報在深圳印刷，如果由《深圳特區報》承印《香港晨報》，咁就有趣喇。

 何解？由深圳特區報做印刷，開機關機咪由北大人掌握囉，新晚報被外界認為左派報紙，可以在深圳印刷冇咩出奇。一份獨立中立的報章可以喺深圳印，就有趣囉。需知道非大陸系統香港報紙要在內地印刷然後出境，一啲都唔易喎。

想當年，要數到上世紀九十年代，《星島》仍是胡仙年代時，胡女士就曾經在蛇口買塊地打算起廠印刷，本來諗住有著數，節省唔少成本，點知後來發現在內地做印刷好多限制，例如唔可以印敏感，否則隨時封廠，印刷好的報紙出境需要檢查同得到批准啦，隨時要驗唔可以出境。只有三份內地官方營運的左派報紙先可以在內地印完運出境。結果胡仙得物地無所用，要放棄在內地印報紙的計劃。

號稱中立的報紙，內容有時都會幾敏感，如果《香港晨報》成功爭取在深圳印刷，又可以輕易運出境，咁其他香港中立報紙咪可以有樣學樣，要求上去內地印囉，咁咪可以節省成本囉?

  

睇嚟《香港晨報》唔係阿爺的報紙，睇佢可唔可以在深圳印就知。其實印刷問題係《香港晨報》面對的一大技術難關，若佢要印二十萬份，在香港可承印公司有數得計，最有能者相信不出東方和蘋果，問題係《香港晨報》和兩大報業集團直接競爭，它們會承印嗎? 所以講來講去，印刷係《香港晨報》出唔出到的核心問題之一。

巴士的團隊

巴士的 Gossip

** 博客文章文責自負,不代表本公司立場 **

呢個世界無奇不有，有一份叫《新晚報》的免費報，早前轉做收費報，隨街貼出手寫原子筆字通告，我地講過佢地係「史上最騎呢的通告」。

呢個集團的騎呢嘢層出不窮，聽記者講，佢地今個星期開咗個史上最騎呢的記者會。

資料圖片(說．在線新聞網)

話說有傳媒提到《新晚報》的免費報停刊，《新晚報》主席夏萍唔係幾順，本周二開咗個記者會要澄清，成個記者會本來有兩家報館派人去採訪，其中一家的記者去到見人丁咁單薄，勢色唔對，就借尿遁走埋，結果就只剩得一個記者留低，佢就係《大公報》記者啦。

咁阿夏萍姐就對住《大公報》記者一個人，開了「前無古人」(唔知後有無來者)的一人記者會。夏萍姐主要澄清《新晚報》無執，只係放三個星期假(真係好僱主)，由免費報轉做收費報啫。

不過千祈唔好以為《大公報》記者無嘢做，或者咁俾面，咁樣的記者會都坐到尾。查實《新晚報》以前係《大公報》屬下的報紙，後來停咗刊。兩年前夏萍姐突然又出來搞一份《新晚報》，仲註冊埋個名，搞到《大公報》好唔老黎，不過俾人叫住唔好嘈啫。所以《大公報》派人去夏萍姐的記者會，可能只係昅吓佢有乜嘢講，唔係想報道。

香港做報紙，真係一雞死極都唔去，另一雞早就開始鳴啦。