騰雞殺手孭晒鑊

商台早一日將志雲大師擺埋一邊做智囊，外界摸不著頭腦，初時以為志雲大師單官司政府可能上訴成功，但睇落又唔似。後來又傳出話志雲做主持唔做得CEO，甚至有傳佢權力無減，此安排是叫佢加大力度控早晨節目云云。但今天一睇商台解僱李慧玲，就知上述猜測都無乜根據。

首先要睇今次商台解僱李慧玲的手法，十分強硬，借住今日跑馬無咗李慧玲主持的節目，即日就通知佢以後不用返工。想當日陳志雲處理李慧玲事件時，又話叫慧玲姐回公司傾，又希望佢傾好咗一齊出席記者會，你話當日志雲大師手段懷柔又得，話佢拖泥帶水亦得，總之佢想做到面面俱圓，等外界無乜藉口批評他，和今天的手法大異其趣，管理層仲擺明在志雲大師調職後馬上出手，好似配套行動。

有資深傳媒業人士形容，陳志雲呢個慘劇，可以咁去形容，老細叫佢做殺手去殺人，佢就十分騰雞，話咁殺人唔得架，會有好大反嚮架，會死人架，不如溫和啲啦，不如唔好殺人打吓人算啦，不如咁咁咁啦…….老細怕咗你，好啦照你意思做啦。若果做完真係有十級颱風，老細覺得你咁搞都OK啦，但做完風平浪靜，老細就有點後悔，覺得信錯你，你咁騰雞點做殺手呀，等我嚟啦。

該名資深傳媒業人士話，過去的社會較平和，志雲大師呢種圓滑人士，面面俱圓，兩面討好，的確係得。但如今社會已經裂晒面，郁啲就打交，打交講實力，圓滑人士想兩面都討好，變成兩面皆不討好。

有傳聞話志雲大師抗命唔願殺李慧玲所以才調職，但照事實分析，都唔係抗命的問題，係覺得你處理得唔好的問題。若然志雲大師係抗命，就應該劈炮，唔應該留在商台做首席智囊啦。

Ariel

** 博客文章文責自負,不代表本公司立場 **

阿爺推自由貿易區救經濟，喺區內做生意，有好多優惠，政策仲彈性過經濟特區。全國各地都爭做「自貿區」，爭到打崩頭。

粵港澳對外貿易經驗豐富，阿爺批嘅機會好大。港商素來眉精眼企，當然唔會錯過咁有著數的機會。近期頻頻北上，跑去廣州同領導打交道，睇睇有乜好路數。話說近期一個團上到廣州，拜會政治局委員、廣東省委書記胡春華交流吓，此小胡被稱為小胡錦濤，係團派六十後的希望。

除咗傾吓探討有冇合作機會，有機會接觸，當然可以了解吓政壇新星的「能量」啦。

講到點樣可以利用「粵港澳自貿區」創造三贏機會，港商們當仁不讓，七嘴八舌，一輪搶攻，發展什麼什麼中心啦，誠意好大，廢話亦唔少。

胡春華聽完各人意見，隨即系統地將紛亂雜陳的意見，拆骨重組，分門別類，總結歸納得井井有條，呢啲係中央政策，地方話唔到事，呢個意見好好，我哋考慮吓點落實呀，呢個建議有得諗，去邊個政策部門傾吓啦。聽得在場的人士滴晒汗，大讚小胡思路清晰，組織及綜合能力之高，令人佩服。

其實，大家唔使太過大驚小怪，內地官員，唔少都係記憶力超強，綜合組織能力一流，表達方面亦都訓練有素。小胡能夠成為兩位進入到權力核心的六十後政治委員之一，自有其過人本領，此番南下，能否為已發展到樽頸位的廣東殺出一條血路，就不單考驗小胡的綜合組織能力，還要擺平各種勢力，當然最不能少係視野同高層次。

能否帶領南大門再現改革先鋒之勢，呢場考試唔易呀。