有人話政務司司長林鄭好打得，當你見識過李國章的工夫後，「 好打得」呢個桂冠要俾阿瑟王李國章啦，佢昨日和港大校長馬斐森開記者會，主要由佢出手，示範以一打七。
李國章直指校委之一的港大學生會會長馮敬恩是「大話精」，不尊重校委會的保密制度，自己在會上對成立檢討委員會投贊成票，但對外宣稱校委會不成立委員會，誤導學生，引發衝擊事件。他又點名批評公民黨背後煽動學生，作出政治干預。
單從李國章開完記者會，引出一大堆泛民作回應，個個磨拳擦掌， 知道阿瑟王變身「政壇葉問」，和所有泛民鬥揪。
政壇高人話，李國章未入港大之前，港大已成一個爛局，前校委會主席梁智鴻斯斯文文，想做好人，想兩邊都討好，結果剛好相反，一樣俾學生砌到傻。政府原本想搵李國章去做中大校董會主席，但見港大局面如此，心念一轉，不如搵佢去港大啦。
高人話，李國章做過中大校長和教育局局長，論資歷無人夠佢深。更重要係佢「唔怕打」，敢於面對泛民的挑戰，在此時此刻搵一個肯去打的人已經好難，仲要打得更加不易，所以就陣前易帥，叫阿瑟王上馬。
如今一試，李國章真係全力打，不會縮頭縮腦。聞說政府最不滿的是在港大事件中，泛民政黨中人積極鼓動， 但佢哋又走出來質疑不讓陳文敏當副校長和讓李國章當主席是政治干 預大學自主，政府認為公民黨等人先至係用政治干預大學自主。可以肯定，唔個話題唔會咁快講完。
Ariel
** 博客文章文責自負,不代表本公司立場 **
李波事件發展至今，立法會議員開始出手，早前傳出有人發動立法會搞專責小組，去調查李波事件。
表面上出現一宗港人失蹤事件，即使他在內地報了平安，但事件詳情仍然未知，立法會查吓亦無不可，但立法會議員係咪調查，玩得幾高姿態，背後就比較複雜的政治同人道考慮。
有個建制派朋友透露消息，建制派政黨內就係咪支持成立專責小組調查李波事件，產生一啲爭拗，傾向贊成的議員話，民間關注李波事件的情緒唔低，唔單止泛民議員嘈，就連工聯會的立法會議員都話要查清楚，泛民提出成立專責小組，如果自己個黨唔贊成，喺民意上就會落後，大家要記住九月就係立法會選舉，任何會令選情受損的事情都唔應該做，所以應該支持成立專責小組調查李波事件。
但亦有議員持相反意見，認為唔應該人做自己就做，按過去同類事件發生情況，有港人被大陸指觸犯內地法律或者涉及某些案件，喺內地接受調查，只要佢的罪行唔嚴重，經過各方面私底下努力斡旋，大陸調查一輪後通常都會俾面放人。
相反地，如果高調跟進，搞到變成政治事件，大陸落唔到台，反而嗰個人就久久不放，所以好多涉及類似事件的家屬會私底下向議員求助，但都希望議員唔好將事件搞大，要以救人為先，特別唔想議員開記者會公開施壓，否則個議員出盡鋒頭，涉案人士就救唔番出來。
李波事件情況類似，家屬已經表態希望外界不要干預，睇嚟佢地都同內地講緊數，有望可以和平解決。喺呢個時候立法會高調成立專責小組去查，究竟係幫到件事，抑或會害咗李波，真係講唔清。
呢位議員仲提到，如果自己想出位，又唔理李波死活，只好企出嚟設出底線，例如要求大陸一個月內要馬上放人，否則就將行動升級，咁大陸就一定唔會放人。事件可以搞大，自己做埋英雄，至於李波使唔使喺內地坐監，就唔關自己事啦！
討論好激烈，個黨都未有結論，話睇吓事態發展再算。不過呢位建制派朋友就話，好多事都可以找出一個民粹式、宣傳式的答案，但係唔係解決到問題就唔知啦。
佢話如果立法會唔係公開會議，唔俾媒體在立法會拍攝之後，議員講的野唔需要下下被公眾睇到，可能作的決定亦會完全唔同，呢啲就叫做政治啦。
